梁佩瑚大爆當年選美「黑幕」

選美季軍出身的梁佩瑚接受訪問暢談當年選美「黑幕」，大膽披露和她同屆參選的陳法蓉違規拍攝周刊封面，事後還當眾落淚扮委屈！

有線節目《娛樂熱辣辣》揭露娛圈鮮為人知的秘密，頭炮嘉賓梁佩瑚不諱言當年選美規矩嚴厲，包括不准佳麗私下接受傳媒訪問：「當時有周刊搵我影封面，我唔敢應承，對方仲游說我話陳法蓉都拍咗，我話無可能，點知後來真係見到佢做封面！」

梁佩瑚記得當時保姆拿着周刊大興問罪之師，陳法蓉自辯是參選前為模特兒公司拍的舊相，還激動落淚表現委屈。梁佩瑚笑道：「點知畀我哋發現佢崩咗嘅手指甲，同佢所謂舊相上嘅指甲一樣咁崩囉，估唔到可以咁複雜！」

此外，梁佩瑚透露當年保母還手執一本操行簿，記錄佳麗操行供評判查閱：「我認我操行麻麻，保母話我唔專心，成日匿係廁所同男朋友講電話！」亞姐方面原來也有操行簿，而操行最差的是楊玉梅一屆！

身在內地的楊玉梅接受電話訪問時透露：「同我同屆參選嘅有吳綺莉，施綺蓮，陳寶蓮等，我地嗰屆好精彩o架！有佳麗用較剪剪爛其它佳麗嘅衫，等佢出唔到場，又有人倒痕粉落人地件衫度，等佢當眾出醜，仲有人打架，真係大開眼界！」

選美出身的梁佩瑚大爆當年選美「黑幕」。

有指陳法蓉當年參選時違例拍攝周刊封面。

（左至右）89年港姐亞軍朱潔儀、冠軍陳法蓉及季軍梁佩瑚。