楊玉梅 龔慈恩行街市鬥靚

無綫拍攝中嘅新劇《牛下女高音》，有唔少令人期待嘅演員演出，配角方面，好似有羅冠蘭、寶珮如，都好耐冇喺電視機出現；另外，楊玉梅、龔慈恩，亦都係好耐冇幫無綫拍劇，見番呢啲熟識嘅面孔，真係難得。

早前，東姑就喺荃灣街市發現，楊玉梅同龔慈恩為《牛》劇拍攝外景。呢場戲係講：劇中嘅龔慈恩係一個唔識買餸煮飯嘅女人，佢為咗討好老公吳岱融，於是就請烹飪好拿手嘅閨密楊玉梅，教佢去街市買餸。東姑所見，五十四歲嘅龔慈恩，同五十三歲嘅楊玉梅，都係出名嘅凍齡美魔女，雖然簡單拍攝一場戲，但都絕對唔鬆懈。兩個人未埋位前，對緊稿嘅時間，啲化妝整頭嘅工作人員已經不停手，幫佢哋執頭執妝；而就算埋咗位，喺roll機前嘅一刻，佢哋都絕不放過，攞出鏡盒粉底喺最後一秒補妝，貪靚程度真係不相伯仲。

正所謂：「世上冇醜嘅女人，只有懶嘅女人」，難怪楊玉梅同龔慈恩一樣咁勤力扮靚，所以咪一樣咁保養得宜囉！

五十三歲嘅楊玉梅，同五十四歲嘅龔慈恩，都係出名嘅凍齡美魔女，行埋一齊拍劇真係有得鬥過。

連梳頭化妝嘅工作人員都好配合，趁佢哋未埋位對緊劇本時，趕緊幫手執頭執妝。

喺roll機前一刻，佢哋都會爭取最後一秒衝刺，照鏡同埋補粉，真係為了靚靚，不容有失喇！

呢場戲係講，兩個美魔女去街市買餸，而楊玉梅仲着住套裝裙加高跟鞋，唔小心畀師奶嘅買餸車撞親。