八九年港姐冠軍陳法蓉，雖已屆半百之齡，但愈來愈「惹火」，九月先有同屆季軍梁佩瑚，爆當年被她出陰招篤背脊，又違例拍攝周刊封面，講大話博同情。

一波未平，陳法蓉於上周五（廿五日）又「瀨嘢」，在慧妍雅集活動上，沒穿上大會外套的梁小冰，大爆被陳法蓉當眾兜口兜面鬧，更嬲到爆喊，開火還擊：「佢好似慈禧太后咁喝人，唔可以恃老賣老！」二人後來還在微博延續戰線，好睇過師奶劇。

「港姐」一向美貌與智慧並重，但有指陳法蓉對人說話尖酸刻薄、無禮貌，又愛擺阿姐款⋯⋯如今兩個月連續被爆seed，令她「犯眾憎」指數，光速飈升。

 

陳法蓉和梁小冰在人後炒完大鑊，性情中人的梁小冰即木無表情，相反陳法蓉仍可以表現風騷。

微博互插

事源是咁的，四十六歲「烈女」梁小冰上周五應邀出席慧妍雅集活動，她穿上大會制服，但因為覺得熱，所以無穿上粉紅外套，她稱因而被陳法蓉當場開拖鬧。「佢一見我就招呼都無打，衝埋我度話做乜唔着制服，黑面兼當眾鬧我。如果我有問題，佢可以拉我埋一邊講，唔係咁惡咁話我，呢啲係基本禮貌，唔可以恃老賣老！」

不過陳法蓉就在記者面前扮無事，還哈哈笑說：「呢個係佢個人感受，我唔會否定。我無咁嘅權去訓斥任何人。」但有指她一入後台，即衝到小冰前再鬧：「咁小事，你搞到咁大件事。」小冰就反擊說：「唔好恰我恰到上心口，你檢討吓你o依家嘅態度，你好無禮貌！」

事件最後不歡而散，後來小冰在微博上發炮：「平時佢點對人我有眼睇，但對我咁樣唔可以接受，以後我唔會出席慧妍雅集所有活動，亦退出唔做會員，因為我唔會畀任何無修養的人，再一次傷害自己！」

另一邊廂，陳法蓉則先後於上周五及周日（廿七日），於微博以「莫名其妙」及「咁大隻死貓啃唔落」開post，未有退讓。

陳法蓉被記者問到事件始末，口窒窒不知如何解畫，情急下指身後的王愛倫（左）可做其品格證人，後者慘被拉落水，但也無發言機會。

梁小冰一連幾日在自己的社交網誌炮轟陳法蓉，由心痛、心傷，直至日前話要求一個「驕傲自大」的人道歉，是癡心妄想！關係勢成水火，無彎轉。本周一她又再自我安慰：「傷痛的心要快快好起來。」（下圖）

陳法蓉同樣在網上發功，事發當日（廿五日）話對指控「莫名其妙」（上圖），到周日（廿七日）就話「咁大隻死貓哽唔落」（下圖），並稱可找Rosa做人證。