關百豪的「時間簡史」

英國物理及宇宙學家霍金窮一生研究宇宙本性，寫下史上最暢銷科普著作《時間簡史》。佢提出，喺我哋平常、真實嘅時間水平線上，有另一種時間，係垂直嘅虛時間（imaginary time）。霍金剛走完佢傳奇嘅真實時間，至於虛時間我感受唔到，但佢嘅時空理論就令我思考，喺每一個時間點上，有人平常生活，一日眨眼就過，有人就準確把握一個時空，一日內嘅決策令事業出現新路徑。

一九九八年一個晚上，關百豪（Bankee）剛和家人到南非度春節回港，落機接到一位律師電話，問佢有冇興趣收購一個出現財政危機嘅金融集團。由於春節假期拖延咗個多月嘅關係，公司嘅財政情況已經到達刻不容緩嘅階段，結果佢當晚去見公司老闆，再用一日時間初步審視公司財政狀況決定進行收購，之後將平常三至六個月嘅盡職審查壓縮到一星期完成兼獲得證監批核。今日回望已經係二十年前舊事，而當年Bankee注資拯救嘅時富金融（0510）就不斷發展壯大。

一日做一個收購決定係咪太快？我唔太相信時來運到，時富集團（1049）董事長關百豪能夠短時間把握時機，其實有賴佢喺銀行界十多年所累積嘅經驗。Bankee睇到當時公司受到金融風暴衝擊而出現財政危機，而佢可以運用自己多年在信貸和風險管理方面嘅知識提升公司管理。

對於金融企業嚟講，二十年係好長嘅歲月，何況中間仲經歷咗二○○○年科網股爆破、二○○三年沙士、二○○八年金融海嘯。Bankee講笑話佢讀書時老師教七年為一個周期，o依家三年都可能太長。二十年來嘅起起落落，佢睇得好通透，每次起落，只要能認清風險所在，就無懼風雨。

面對傳統經濟循環，Bankee認為有危亦有機，但係近年金融科技興起，對於證券行業會否帶來衝擊？佢不單唔抗拒，仲認為證券界應該擁抱、駕馭和應用科技。香港金融業累積幾十年經驗，亦達到規模經濟，所以我哋嘅競爭優勢並唔係短時間可以複製。內地中產和企業崛起，加上大灣區嘅建立令香港業界可以在九個內地城市發展，Bankee對金融業前景非常睇好。

至於佢收購實惠集團轉攻零售嘅決定，就定位在於能否透過加強管理而為公司增值，而且零售業務有現金流，可以支持集團發展。事實上，佢接管實惠後，由營運控制、產品組合和顧客服務三方面着手改革，幾年間由沙士期間各店每日營業額平均得三萬到轉虧為盈。雖然佢話零售並唔係rocket science，但係佢無零售經驗，所以一邊虛心學習，一邊用心管理。佢講得啱，零售係服務客戶，要令客戶體驗好就要易地而處，諗吓佢哋要乜嘢產品同服務。

好似近年出現好多納米樓，擺得梳化又擺唔到張牀。Bankee見到東京、倫敦、紐約開始有蝸居化趨勢，五年前已經帶領實惠團隊做市場分析，着手發展多功能傢俬，利用設計心思，成為空間管理專家，令蝸居變「窩」居。咁窩心，唔怪得贏得忠心客戶。