八十後Go For科技

今時今日年輕人要喺物價高企嘅香港創業難唔難？答案呼之欲出！不過，世事無絕對，只怕有心人。只要你手上有兩萬蚊、有好拍檔、有橋，不妨從本地公司高高客貨車GoGoVan嘅發迹故事取經。GoGoVan正正係由三個香港後生仔用五年時間打拼出來市值10億美元嘅貨運平台王國。前排好開心同GoGoVan聯合創辦人兼營運總監關俊文（Reeve）傾吓創業故事，我將佢哋嘅初創經歷歸納四大要點，好讓諸位年輕人參考。

第一，成功貴創新。五年前，三個初出茅廬嘅八十後雄心壯志，成立全港第一間飯盒廣告平台Boxad，每日為一千間餐廳速遞超過一萬個附有廣告嘅飯盒，由於初起步難以同傳統電召中心（call台）訂長約，變相每日必須打上call台揾司機送飯盒，浪費大量時間處理飯盒運輸問題。三位老闆靈機一觸，就發掘咗創立GoGoVan嘅契機，搭建全亞洲首個用手機應用程式（app）嘅貨運平台，搶咗頭啖湯，仲改變咗香港整個貨運業生態，客人唔使再同貨車司機單打獨鬥互相就時間之餘，貨車司機亦有更廣客路，達到雙贏局面。

第二，成功在勤力（此乃老生常談）。GoGoVan初起步時不免有資金不足嘅問題，Reeve提到當時三個創辧人連兩位拍檔每人夾二萬蚊創立公司，捱半年冇糧出事小，半年後公司營運資金見底至係迫切問題。當時佢哋積極四出揾水喉注資，最終得到天使投資者注入一百萬作為公司備用資金，同時再向數碼港申請創科資助，利用有限資源馬不停蹄做marketing工作，兼親自行勻十八區游說貨車司機加入車隊，壯大聲勢。現時香港車隊已有三萬八千名司機，電召後十至十五分鐘內到達，每日處理超過兩萬單生意。

第三，成功在於見微知著。創辧人觀察行業現況，捕捉司機、客戶心理，尋找不足之處而提供更好嘅解決方案，呢點至為重要。以前司機每月不但要向call台支付逾千元台費，訂單數目仲要無保障，司機揾食比較困難。GoGoVan從解決司機收入問題出發，開拓應用程式平台降低成本，因此司機可以免費加入車隊，呢個模式令司機和平台之間嘅利益更均衡。此外，平台必須有信譽，龐大市場引來眾多司機加入，但樹大有枯枝，於是GoGoVan又設立評分機制，現時司機平均達4.7分（5分為最高），而屢遭投訴嘅司機亦可能被中止合作，確保服務質素，令客戶更有信心。

最後，成功須適時擴張。開拓香港市場後，三位後生仔絕不怠慢，野心勃勃地擴充版圖，成立僅四年多就獲騰訊垂青，二○一七年與騰訊旗下58速運合併，未合併前內地只有八個城市據點，合併後已有逾一百一十個。現時業務亦已擴展到新加坡、韓國和台灣等地。

GoGoVan搖身成為未上市市值已逾10億美元嘅港產獨角獸，員工由三百增至一千三百多人。成績斐然，絕非僥倖，後生仔如手持以上四條車匙，我嘅建議係Go for your Goals！