看能力定目標成功可望又可達

據最近立法會秘書處資料研究組公布咗一份名為《香港家庭面對的財務挑戰》嘅研究簡報，發現本港住戶去年每月平均開支較十年前上升46%，當中又以住屋開支佔嘅比重係最大，達36%；居於私人房屋嘅家庭住屋開支更高達40%，年輕人睇嚟真係要靠「父幹」先可以買到樓。

好記得七三年我港大畢業後入咗滙豐，嗰時真係無諗過要即刻買樓，反而因為兒時夢想達到，入到銀行度做就已經令我開心到不得了。喺當年買唔買到樓反而唔係最重要，當然有人可能會話我同現實脫咗節，因為已經有樓先會咁講。大家可能有所不知，當年我喺滙豐實習嗰三年，都係死捱爛捱咁先捱過去，由細到大我鍾意一蚊一蚊咁儲錢，鍾意儲利是錢之餘仲又會食少一餐咁去儲多啲錢，喺滙豐之後我繼續有轉工又再轉工，但都係慢慢咁去儲筆首期返嚟。

買樓可能係你嘅人生目標，但唔一定係佢嘅人生目標，有人可能鍾意環遊世界，有人可能鍾意買車，總之每個人嘅人生目標一定不盡相同。我認為無論點都應該早啲定下目標，做起嘢上嚟就又會畀多啲心機去做囉，畀心機去做目標就可以快啲達到；達到咗一個目標，我哋又可以好快去定下一個目標，只要有咗清晰嘅目標，做起事上嚟就會起勁啲同積極啲。

份簡報又顯示喺物價高企嘅香港，有市民甚至要靠借貸度日，導致家庭債務近年持續飆升，咁即係話可能養唔掂自己亦養唔掂父母，咁仲邊有閒錢可以儲起。我無需要借貸度日所以唔知當中滋味，不過人生苦短，大家凡事唔好睇得咁灰，反而謹記希望在明天，我相信機會其實係人人均等，有唔同嘅係大家喺當中所付出嘅努力唔一樣。咁當然唔排除凡事都有運氣存在嘅可能，不過hea住去做嘢，就算有運氣嘅幫助都唔好妄想會有意想不到嘅結果囉。

總而言之，人生目標又好，財務挑戰都好，就好似周星馳喺戲裡面曾經講過「做人如果無理想，同條鹹魚有咩分別」。我贊成無論做咩事，無理想就好難會令自己定下目標，無目標就好難會好努力去做，無好努力去做事就好難奢求會有意想不到嘅成功。我重申不勞而獲喺現實生活中基本上係唔會有，定下「目標」先係最緊要，再加埋去到唔同嘅年紀大家可能都會有唔同嘅人生目標，不過就算真係定咗個目標，其實都可以因應自身環境同心境嘅改變去變通，實在唔需要強加個框框畀自己咁辛苦o架喎。我覺得應該按自己嘅能力去定目標，否則眼高手低抑或知易行難，成功都只會係可望而不可達，唔達標就好容易打擊自信心，亦好難說服自己再去定下一個目標。