事物對錯不能單看表象

唔知大家有無曾經講過：「畀我一定唔做SALES」、「畀我一定唔同邊個一齊」、「畀我一定唔住邊度」……等如此決絕嘅說話？有趣嘅係，唔知係巧合定天意安排，你愈唔做嘅事、唔想見到嘅人，總會響你人生旅程當中出現。我好記得年輕時候，我媽媽叫我千祈唔好掂股票，唔好投機，怕我會輸錢，所以我中學畀心機讀書，一心考上港大，希望畢業後一係打政府工或做銀行工，穩穩定定過一生，殊不知命運還是安排了我入證劵業，仲做埋股評人。不過，我奉行嘅理念係投資，唔係投機，所以都唔算唔聽阿媽話！

記得年輕時， 阿媽曾經叫千祈唔好掂股票，但想不到日後更做了股評人。

未必所有人都曾為自己定下界線，但心底裏總有一個「潛意識」唔想某些事情發生，又或者某些人出任某些崗位，但奇怪嘅係，世事往往就要你去面對。坦白講，年輕時當我遇到一些唔喜歡嘅人和事，都好想「落閘」，但結果係你愈想排斥，個天就愈係要你面對。後來經歷了咁多年喺職場上嘅「打磨」，明白了一個大道理，就是要你學懂睇人和事要全面，無論結果係點，響過程中一定有所得着。

經濟學假設人係自私的，任何人睇事物都會以自己嘅價值觀同自身利益去批判對錯，問題係，世上萬事萬物唔係咁簡單睇表面。就以特朗普當選美國總統，跟英國脫歐一樣係一隻「黑天鵝」，我們局外人睇落會唔明點解美國人會支持這個狂人上台，但我有幾個移居美國嘅朋友都認為特朗普當選一啲都唔意外，佢哋所持嘅理據有二：一）所謂民調，根本反映唔到國民嘅真正取態（朋友們唔係馬後炮，早在大選前已指出），好多人否定特朗普嘅原因，係因為佢嘅政綱「離經叛道」，但其實好多反現實（包括種族、宗教、經濟）嘅要點，正正切合好多美國心目中嘅HOT BUTTON；二）支持者都認為特朗普競選時所講嘅「嘩眾取寵」政網，實行起來根本好多掣肘，所以投佢嘅人，預咗佢張支票唔會完全兌現，但最低限度會令現狀有所改變。因此，普世價值認為唔啱嘅東西，最後係啱定錯，根本係無可能一錘定音。

投資亦一樣，在市場流傳嘅主流消息或者意見，我哋真係要明辨是非，大行或市場人士一般會推介股票嘅利好因素，好少特登話某隻股票唔好，但我哋要分析清楚，佢哋唱好嘅原因，無講嘅風險係乜，甚至會唔會暗中沽貨呢？

未來香港面對好多挑戰，亦預計要面對好多負面嘅表象，我哋應該學習不要將思維困於負能量當中。況且身邊好多所謂負面嘅東西，有時候係自己加以放大，當時間一過，原來只是微不足道。近年我習慣了一套「思」與「行」嘅模式，就是面對愈負面嘅人和事，就愈信背後應該有更好更正面嘅出路，所以最終結果如何，係取決於我哋本身如何去想同如何行動。好像過去我在職場上遇到嘅一些所謂「危」，如果我選擇悲觀咁面對，結果一定不會像今天一樣了。同樣地，每一個香港人，也應該以正覺態度去睇我哋嘅將來、我哋嘅家！