希瑪疫情後伺機擴張

呢期係二○二二年最後一期，通常到年底，大家都會總結吓一年嘅工作、學習、投資成果，或者去過咩地方等，但今年相信大家都係處於「平淡是福」嘅狀態，最希望當然係身體健康、百毒不侵，所以我會延續過去幾期嘅「健康系列」。
近日中港兩地大幅放寬防疫措施迎新歲，國內推出「新十條」防疫政策，縮減核酸檢測範圍，鬆綁大部分跨區出行限制；而港府則逐步撤銷社交距離措施。上期提到，隨住社會朝向復常，專科診療需求將隨之釋放，眼科係其中之一。
內地眼科患者數目持續攀升，北京大學國家發展研究院上年有報告預測，未來內地將有近十一億人患有近視；衞健委亦指初中及高中生近視比率分別高達七成和八成，可見近視治療市場潛力龐大。早前同希瑪眼科（3309）主席兼行政總裁林順潮醫生（Dennis）傾向內地版圖，以及其他專科發展。
希瑪自二○一三年起北上，成立內地首間全港資眼科醫院，其後一直主力發展大灣區和深圳市場。到今日，公司旗下逾六十間醫療機構之中，有近一半位於內地，其中五個醫院項目坐落大灣區，遍布深圳、廣州、珠海和惠州，而佛山醫院亦快將投入營運。

希瑪眼科林順潮醫生（右）。

有見於內地疫情不確定性持續，Dennis坦言過往三年資本開支傾向審慎，務求預留銀彈，喺疫情後適時擴張。由於醫院須全天候運作，營運成本相對高，另一方面，單靠門診已可處理九成八眼科手術，故此採取1+N投資策略，每個據點以一間醫院為核心，圍繞醫院建立診所網絡，方便靈活調配人手，亦有助提高成本效益。
為擴大收入基礎，希瑪近年橫向拓展至其他專科，包括牙科、口腔科、腫瘤科等，今年二月更完成收購連鎖牙科集團愛康健控股權，共同發展一站式「眼+牙」醫療服務。Dennis指內地開業平均需要兩至三年打造期，但希瑪同愛康健擁有相若客戶基礎，可發揮協同效應，縮短時間成本，助品牌加快打入市場。喺疫情前，愛康健超過六成病人來自香港，相信中港通關後能重獲客流。
希瑪於二○一八年上市，公司喺短短四年間，收入已翻逾兩番。公司業績表現佳，自然吸引投資者青睞，今月初希瑪引入內地重量級投資者龔虹嘉為策略股東。龔虹嘉本身係海康威視聯合創辦人，亦係細胞基因工程公司中源協和董事長，相信日後可以同希瑪創造協同效益。認購新股​將佔擴大後股本約百分之二點三七，並設一年禁售期。有「猛人」加持，市場反應不俗。
除咗加強硬件建設，人才培育亦好重要。今年十月，希瑪眼科聯同香港中文大學（深圳）合辦眼科研究中心，並由Dennis出任中心主任。研究中心將聚焦臨牀眼科、基礎視覺科學研究、眼科新藥、新儀器研發等範疇，務求打造眼科界嘅國際科技創新平台，培養高質醫學人才。