惜用惜食源頭減廢

閱報得知「綠惜地球」指出連鎖服裝店由以前一年換四次季，增至o依家每兩至四周轉一次季，喺速食時裝文化薰陶下，消費者除咗購物慾增加，連購物量亦相繼會增加埋。我好慶幸唔屬於時時同常常要購物嘅消費者，我比較傾向寧願畀多啲錢買樣貴啲但質量好啲嘅貨品，一來因為價錢貴啲咁我就無咁容易成日買嘢，二來我亦無咁容易想買咩就亂咁買，浪費資源又唔環保。

不過身邊都有啲朋友同我嘅做法唔同，佢哋講鍾意購物係想促進社會嘅安定同繁榮，幫助同振興零售行業嘅長遠發展，佢哋仲話買嘢係零售療法（retail therapy）可以幫助減壓，仲慳番睇心理醫生嘅藥費喎。值得一提嘅係喺呢班朋友當中你唔好以為只有女士，鍾意買嘢嘅好早以前已經唔只係女士嘅專利，而且男女平等，所以我班鍾意買嘢男士朋友為數都唔少o架，哈哈。

有時我都想知點解啲朋友會咁鍾意買嘢，亦都好想知點先會被界定為「天生購物狂」。從救世軍嘅數字顯示，去年機構收到超過二百八十四萬公斤回收衣物，較一三年二百五十九萬公斤多出近二十五萬公斤。唔怪之得北角有舊衣回收箱被塞爆之餘，連箱外衣物都堆積到好似山泥傾瀉咁嘅情景。我覺得身邊呢班朋友對社會除咗有經濟效益嘅貢獻之外，對舊衣回收，及因為衣服根本無用武之地而被送去堆填區嘅貢獻，都應該有少少囉。

據「綠色和平」一項調查發現港人年棄十一萬噸紡織物，即係等於每分鐘差不多廢棄一千四百件T恤，數量足以鋪滿「二點五萬個」香港大球場，更甚嘅係當中七至八成廢棄回收嘅衣物可能係全新或者只穿過幾次，有啲連價錢牌都未剪。睇到呢個數據我都覺得有啲震驚，一個小小嘅香港竟然可以有咁大嘅浪費威力，咁如果全世界嘅廢棄物加起上嚟個數據我真係唔敢想像。

先前提過我雖然重質不重量，但我諗當中都曾經有試過貢獻浪費嘅經歷，畢竟o依家物質同資源都咁豐富，要廢棄衣物廚餘實在係太容易喇，所以諗諗吓帶頭做起源頭減廢成效先應該會係最大。知易行難，但如果自己先做，要說服人哋跟着去做都會易啲嘅，父母如果可以加強身教、學校如果可以再加強環保嘅教育、小朋友如果可以由細就培養起環保嘅訓練，對減廚餘同減廢嘅幫助一定會有較正面嘅影響。我哋嘅生活環境同我哋嘅下一代，都好需要我哋大家出一分力去愛護o架。