沒有牆的世界

消委會透過街頭訪問1,010人，分析受訪者對網上購物嘅睇法，搜集受訪者嘅網購經驗，得出嚟嘅研究報告指出，由二○一三到二○一五年間，每年會收到三千三百到五千六百宗有關網上交易嘅投訴，佔總投訴11到18%，所以建議政府引入新規例加強監管網上銷售行為，包括規定商戶必須披露身份嘅資料同聯絡方法，考慮仿照歐盟及英國等國嘅網購退貨交易條款，兼且應清楚訂明網上『消費合約冷靜期』等等，畀網購消費者可以喺限期內取消網上交易嘅權利。

我雖然無網購嘅經驗，不過相信網上消費金額一般都應該唔會太貴，據我身邊有網購嘅朋友講，佢哋好多時喺網購咗，後來發現產品唔啱嘅就算數，唔會特別花時間去取消單交易，我諗呢個都可能係部分網購消費者嘅消費模式。作為實體消費者嘅我，就覺得買賣合約係應該清楚列明基本消費權益同條款，咁樣做對普羅網上嘅消費者會公平啲嘅，而且買咗唔啱嘅嘢放咗喺度亦都好唔環保。

報告又指出表示滿意及非常滿意嘅網購消費信心達98%，我又真係無諗過網購會有咁高嘅消費信心喎，受訪嘅網購消費者同時透露每年平均嘅消費額超過一萬五千元，每十天就平均要網購一次。我雖然唔知網購嘅魔力有幾大，但有朋友曾經笑着話『網購』喺佢賢內助嘅小三，佢太太隔日唔上過網買嘢，就會頭暈身㷫，而且仲連累朋友想食番餐好嘅都唔得，聽佢咁講好似有啲誇張咗咁。不過我都有同呢個朋友講，叫佢提醒太太要小心網騙，同埋亦有可能喺網上買到冒牌貨。不期然我就跟着去諗，廣大選民投票選咗無宣誓嘅準議員出嚟，如果市民同樣可以享有一個『冷靜期』，去取消呢單交易又唔知得唔得呢，我覺得咁樣做係保障咗選民投票嘅權益囉，哈哈。

喺o依家呢個科技咁發達、事事以社交媒體行先嘅社會度，就算我哋唔會網購，都一定會上網攞資訊o架喇，不得不承認網上消費嘅出現，又真係幫到一班有志創業嘅年輕人，為佢哋提供一個容易入門做生意嘅交易平台。遲啲仲話內地有電商，除咗大搞光棍節之外，仲有超級秒殺日、龜速險等花招多多嘅網購推廣活動，電商更會借AR（擴增實境）同VR（虛擬實境）遊戲嘅幫助，務求令網購促銷更吸引眼球。講真網購又的確可以為大中小企業帶嚟商機無限，網購嘅個人優勝之處，就係佢可以打破地域界限，只要大家唔瞓覺，基本上24小時都可以購物。

o依家做咩嘢好多人都講求網速，即係『唔趕，不過要快』咁嘅生活態度，『網』好快就會成為每日開門第八件事，無網不歡更加係我哋日常不可或缺嘅生活元素，諗諗吓其實呢種咁嘅生活模式真係唔知好事定壞事。