容海恩：需構建更大平台服務社會

從事律師工作近八年的容海恩，雖在成長路上尋尋覓覓，但感恩沿途有貴人相助與扶持，今期Eunice續與陸叔暢談盼藉自身力量回饋社會，並兼分享她以往的經驗、希望讓年輕人少行些冤枉路。

陸：Eunice，你從IT轉行做律師，有無覺得好似經歷咗好大嘅轉變？

容：陸叔，我喜歡跟唔同嘅人交流，又唔鍾意坐定定，之前做IT對得最多嘅係四幅牆同一部電腦，我鍾意做高流動性嘅工作多啲，所以我轉做律師係揀啱咗。

陸：有關電腦嘅罪案有持續上升嘅趨勢，你嘅IT知識幫唔幫到你處理呢類型嘅案件？

容：都要視乎係咩案件嘅，我覺得做律師如果有多方面嘅見識，一般都應該幫到兼做得好啲嘅。

陸：你做咗律師幾耐，做律師之後對人生嘅睇法有無唔同咗？

容：我做咗律師八年，平時有客人上門搵我幫手，都只係畀五分鐘法律諮詢，就可能解決到問題。有時個別客戶因為收到告票覺得好驚，當諮詢完了解咗發生咩事就又會安樂晒，所以我覺得就算有五分鐘、十分鐘嘅法律援助都會對受眾有幫助。

陸：法律諮詢唔係每分鐘收費嘅咩，埋單時仲分分鐘可能會好貴？

容：除咗私人執業要收費，香港民政處嘅當值律師都有義務法律諮詢提供畀市民，只係輪候嘅時間會好長，義務嘅法律諮詢其實係問極都唔夠時間。

陸：我覺得做律師嘅基本應該係要公正公義，係咪咁令你願意提供呢啲義務嘅服務？

容：可能從小我鍾意抱打不平，雖然想法大家好多時會有唔同，最重要識得攞到個公正嘅位，要識得點去衡量對雙方利益都公正嘅，我鍾意做呢個持平嘅角色。

陸：你係幾時開始有呢個想幫人嘅心呢？

容：我啱啱畢業嘅時候，受人邀請做咗好多義務嘅社區工作，例如幫吓家庭福利會、婦女會又或者地區辦事處。逐漸就越嚟越多機構會搵你，但時間上唔允許，於是好多時會搞講座令到受眾嘅平台大啲，可以喺同一時間為多啲街坊解釋同一個話題。

陸：你係幾時開始覺得需要大啲嘅社區服務平台，你又加入過邊啲團體呢？

容：初時我係加入一啲小團體，識咗一群朋友之後，我哋就創辦咗專業及資深行政人員協會（簡稱：專資會），透過專資會識咗好多政商界朋友，佢哋政商界嘅平台更大更廣，我已經執業幾年，加上依家嘅社會都好似有啲亂，我覺得係時候要為社會做多啲嘢同埋幫地區發聲。

容海恩憑個人力量，回饋社會，亦以人脈關係助年輕人創業：「希望佢哋行少啲冤枉路。」

陸：因為咁你就決定加入政黨？

容：啱啱開始時我冇諗過要入政黨，但法律界嘅老行尊同前輩從商業角度認為，如果從事法律就唔應該加入政黨，無論入建制派又好抑或泛民又好，都可能畀客戶認為我有偏頗，令我在公在私都唔想加入政黨。

陸：係咪因為一直以嚟你覺得做律師賺錢嘅重要性相對應該大啲呢？

容：喺初時我淨係諗要為我嘅客戶爭取最大嘅權益就得喇，唔使理佢哋嘅政治背景，但係人哋可能未必咁諗你，亦因為咁我就更加唔想入政黨，點都有啲怕會影響到生意。

陸：咁點解之後又改變咗諗法，係咪始終覺得需要有政黨呢個平台呢？

容：主要因為想服務社會，要做就一定要搵到個合適嘅平台，我係唔相信可以搵到一個完全冇政治色彩走中間路線嘅平台，而且中間路線一時一樣，如果我都唔熟悉又點可以一齊走落去。

陸：只要搵到一個啱嘅渠道或者夥伴一齊去做，做咩嘢事相比起嚟應該係會輕鬆多啲嘅。

陸：Eunice，有冇咩事令你覺得現時嘅香港真係需要有人出嚟幫手發聲呢？

容：「佔中」對我嘅影響都幾大，見到好多年輕人走上街，我好想知道佢哋嘅諗法同抱怨係咩。我想知點解依家社會有咁大嘅負能量同咁大嘅怨氣，係咪因為單一件事抑或係整個年輕人嘅體制，教育嘅問題抑或係整個社會真係對年輕人有好多不公嘅地方。社會依家欠缺嘅就係七、八十後嘅聲音，尤其喺政商界嘅層面，識用IT可以協助我去了解年輕人嘅諗法。

陸：呢幾年你喺好多社區活動都幾活躍，你哋成立嘅香港青年專業網絡（簡稱：青專網），有無咩目的同抱負？

容：我係專資會創會會員又係依家嘅理事，我想透過青專網呢個平台去接觸年輕人，我擁有專資會嘅人脈，雖然時下嘅年輕人未必符合入會門檻，但可以介紹佢哋認識專資會嘅人脈，令佢哋有向上流動嘅機會。