建滔的綠色發展大道

剛過去嘅兩會上，經濟復常固然係焦點議題，不過拼經濟之餘，亦要顧環保。會上提到未來五年要加強生態環境保護，主張綠色轉型，打好藍天、碧水、淨土保衛戰。而內地政府喺今年二月亦曾召開中國生態環保會議，提倡大力治理工業污染。作為覆銅面板龍頭嘅建滔系，上周公布全年業績，建滔集團（0148）執行董事張家成（Eric）一如以往上我節目接受訪問，解構業績之前，當然要傾吓呢場保衛戰。
中國強調實現雙碳目標，推進工業節能減排，而建滔產業鏈覆蓋化工、覆銅面板（Laminates）和印刷線路板（PCB），各項業務無電不能，理應深受影響。不過Eric冇擔心，事關集團早已轉向低碳發展，喺六十間工廠之中，目前約有二十間已設有太陽能光伏發電站，環保之餘亦可減少天然氣使用，所節省能源開支，令工廠四年已可以回收設備成本。另亦配置蓄熱式焚化爐，將排出嘅廢氣轉化為能源，每月再節省約三百噸天然氣，長遠既能提升生產效益，又符合國家減碳政策。

建滔集團主席張國榮（中）及執行董事張家成（左）。

建滔集團主席張國榮（Paul）補充，溴素係生產環氧樹脂同阻燃劑嘅必備原料，主要由死海和約旦地區嘅海水提取而成，全球年產量約八十萬噸，但近年產量放緩形成樽頸。雖然中國有大片海域，但溴含量只得百分之一至二，開發效益低之外，提取過程更會污染海洋。有見及此，近年建滔積極研發無鹵素覆銅面板，提高生產自主性，減低對入口依賴，亦更環保。
二○二二年，建滔集團營業額按年跌一成三至四百九十三億元（港元，下同）；基本純利三十八億元，按年降六成三。Paul解畫，上兩個財年可謂集團生意高峰，由於環球電子產品強力反彈，因此亦係行業難得一見嘅「顛」峰期，差不多所有數得出嘅材料都缺，佢講笑話造出嚟嘅覆銅面板和PCB仲暖暖哋，都已經畀人搶購。行業周期總有起有落，鑒於內地疫情、俄烏戰爭及全球高通脹等因素，上年電子消費市場明顯回軟，產品量價從高位回落，加上上年業績基數大，出現跌幅係意料中事。
不過逆境見真章，建滔系憑藉垂直生產優勢，目前工廠產能仍有九成訂單支持，比同業高出三至四成，有助支撐未來業績。為維持垂直和成本優勢，集團計劃加碼擴大泰國產能，當地生產佔比將由一成增至約兩成，主要係睇中當地工人勤奮且效率高，並考慮到歐美客戶要求。管理層亦研究於東南亞其他地方設廠，加強拓展海外市場。
全球經濟邁向高通脹、低增長時期，環球央行繼續加息，就連銀行都相繼爆煲，Paul坦言目前正值大型轉角市，未來兩年仍然充滿挑戰，投資策略亦穩陣為上。建滔財務向來穩健，母公司淨負債比率百分之二十，子公司建滔積層板（1888）百分之七。水喉充裕，派息亦見大方，兩母子分別派末期息七十五仙和二十仙。今年適逢建滔上市三十周年，集團會否向股東送大禮派發特別股息，作為小股東嘅我拭目以待。