容海恩：凡事不強求　卻並不代表放棄

經過近十年努力奮鬥的容海恩（Eunice），漫步人生路上持續兜兜轉轉，從小到大成績非常一般，大學畢業後在求職路上亦一直尋尋覓覓，惟慶幸在○三年回港後遇到現時在法律界的「師父」，迎着機遇逐步進修及不斷摸索，終憑其不放棄精神而成功蛻變，今期就由她親自訴說其轉變成長之路。

陸：Eunice，你係咪好細個就立志要做律師？

容：陸叔，由細到大我無諗過又或者計劃將來想做咩，求學時期嘅成績可以講係好差，我喺香港聖芳濟各學校讀到中五畢業，會考成績連原校都升唔到，後尾去咗玫瑰崗中學讀到中七，諗住只係漁翁撒網咁間間大學同咩科都報齊，我記得當時第一志願係想去叩港大校門讀音樂，不過最後當然無被取錄啦。

陸：聽你咁講你應該都有啲音樂天份先會揀呢科嚟報？

容：其實純屬巧合，嗰陣係因為逢周末都有兼讀兩年演藝學院課程，但我始終有個傳統又現實嘅諗法，讀完中學一定要去升讀大學，好自然冇考慮揀音樂呢條路嚟行，不過就有一直堅持進修呢科，但我喺音樂方面亦唔算出色囉，哈哈。

陸：可以分享下點解你中學成績會唔好嘅？

容：主要係唔鍾意背書、又唔識讀書，淨係諗如果理解咗就得、點駛背書嘅，後嚟就發現老師畀分原來係睇我哋中唔中到個要點（point）。

陸：哈哈，喺我哋人生際遇之中，有好多嘢又咪係好睇中唔中到個要點。咁你當時有無諗點去補救自己不足之處呢？

容：我有去讀夜晚嘅補習班，好多補習天王嘅班我都有上過o架，可能真係自己讀書嘅方法唔啱啩，成績始終無咩突破。

陸：就因為咁你就揀去外國讀書，你係咪有朋友或者親戚喺嗰邊？

容：當年我喺高級文憑會考肥咗化學嗰科，好難喺香港搵到有大學肯收我，咁啱當年好興上網，咪即刻上網搵外國升學中心嘅資料，去加拿大溫哥華讀書係我自己揀嘅，喺嗰邊我其實一個朋友、親戚都冇，主要係因為喺嗰邊讀書相對比較平。

容海恩多年來沒有放棄，經過多翻兜兜轉轉，終於踏上律師之路。

陸：你無考慮其他地方好似去澳洲咩？

容：想去澳洲、美國就完全唔使諗，嗰陣好多人揀去呢啲熱門地點，學費相對比較貴，當年升學中心話去溫哥華幾萬蚊就已經搞掂，順理成章咪揀去溫哥華嘅哥倫比亞學院（Columbia College），嗰陣喺學院嘅頭一年相等於當年大學嘅第一年，讀完一年之後就可以直升上大學嘅第二年，咁我諗都唔算嘥時間吖。

陸：聽落有啲好似我哋香港嘅副學士？

容：但如果讀完頭一年連接唔到入大學，咁就要重新嚟過乜都冇，規則同玩法都唔似副學士。

陸：咁你去到嗰邊揀咗讀咩科，有冇時不時諗着「要好努力讀書」呢？

容：當時九八年全世界都好興電腦，所以第一志願就揀去讀電腦，大學第一年嘅成績其實唔差，GPA有三、平均成績都有B，但好不幸當時報咗十間大學竟然冇一間肯收，其他同學大概喺五、六月就已經收到錄取通知書，咁咪惟有再報讀社區大學（Community College），諗住讀埋第二年先直入大學嘅第三年，好彩喺八月底新學期開始前收到英屬哥倫比亞大學（UBC）嘅取錄通知書。不過第一年我都讀得好辛苦、全部係天地堂，嗰陣頭一年連唐人街都冇去過，好多時候仲要留喺學校，四年大學生涯我算修心養性、都係坐巴士返學放學，專心諗着拎到個學士學位，就叫做對自己同屋企人有個交代。

陸：Eunice，你喺四年大學生涯裏面有冇諗過自己將來想做啲咩？

容：嗰時讀完四年電腦科學，係想做返同電腦有關嘅行業，有機會亦好想留喺加拿大嗰邊搵工，畢業後仲去咗EA Games面試，差唔多取錄嘅時候先發覺我冇加拿大戶籍最後佢哋唔請。

陸：咁之後係咪順理成章返嚟香港？

容：陸叔，當時我仲有啲堅持，喺UBC搵到一份研究工作，都叫做返電腦嘅嘢，而且一做就做咗兩年，份工上班嘅時間好彈性又足夠養到自己，不過溫哥華始終係適合退休人士多啲，對當時年輕嘅我覺得悶啲，終於喺○三年沙士，機票做特價兼買一送一，就決定返嚟香港。

陸：咁返香港之後你又做過咩類型嘅工作？

容：我從來冇特別諗過自己要做專業人仕，好似去做醫生又或者去做律師，○三年因為沙士香港經濟唔好，周圍嘅工資都係六千元左右，咁啱我參加咗一個德文進修嘅計劃想邊學邊做，初時仲要不停翻譯英、德文嘅資料，都有啲吃力，為咗可以賺多啲外快，嗰陣我有幫小朋友補習，當中有個家長就係我依家喺法律界嘅「師父」，聽過師父嘅職業生涯分享後，令我好希望學到佢，於是喺○四年開始，就的起心肝去報讀城市大學嘅法律課程，經過十年嘅努力終於搵到真正屬於自己嘅目標。

陸：聽你講咗咁耐似乎你做好多嘢都無咩特別嘅計劃，不過睇嚟你嘅努力都無白費到唧，無特別舖排仲反而攞到意想不到嘅效果，所以有時做嘢遲嚟嘅效果總好過無到（better late than never）好囉。（待續）