政黨搶閘宣傳戰 容海恩廿萬落廣告
立法會選舉如箭在弦,各路人馬未表態參選,已急不及待在各區掛上大型廣告版力銷政治理念。盛傳有意出選新東直選嘅「法律界桂錀美」容海恩最落本,以青專網主席身份喺獅子山及大老山隧道出入口,掛上印有佢甜美笑容嘅大頭廣告牌,令唔少宅男司機嗒糖。
據聞呢兩個廣告位,每月使費共廿多萬。如此揼本,莫非為參選鋪路?容海恩不置可否說:「都係宣傳青專網啫!」
傳聞有意參選「超級區議會」嘅民建聯副主席周浩鼎同樣好落本,五月開始喺粉嶺港鐵站外當眼位置,擺放超巨型「人頭廣告」,聽聞每月廣告費近幾萬元。
被指有意染指立法會嘅容海恩,月前開始在獅子山隧道口當眼處掛出搶眼頭像廣告,人氣急升。
方國珊近日亦異常積極落區,日前在坑口大派「防蚊包」及環保燈泡做宣傳。
其他疑似候選人就算豪唔起買廣告,都喺全港各區「偷步」掛宣傳品,西貢區議員方國珊近日仲頻頻落區派「防蚊包」,展開軟銷宣傳功勢。
有知情人士解釋,未表態參選前,宣傳費係唔使計入選舉經費,但食環署有權以阻街為由沒收宣傳品,「有人兩星期內被拆走四十條橫額,每條罰款二百幾蚊。」佢續稱,疑似候選人逼住提早打宣傳戰,全因今屆立會七國咁亂,每區參選名單隨時二、三十人,「宣布參選後,預咗每人分得不足五十個橫額位,如果到時先掛,恐怕爭唔到靚位,鬼識你? 」知情人士笑說。