兔兔不絕論港股

回顧壬寅虎年港股表現，全年走勢猶如過山車，恒指於二月中見全年高位二萬五千零五十點，其後持續受壓，主要由於東歐地緣政局緊張、聯儲局因通脹高企而大幅度加息，加上中國內地疫情與管控措施，以及房地產市場疲弱，導致投資氣氛不振；恒指走勢一浪低於一浪，喺十月一度跌穿萬五點。不過慶幸虎年苦頭不苦尾，隨着內地逆轉防疫政策，中港逐步恢復通關，帶動港股重上二萬二大關。整個虎年埋單計，指數下滑一千七百五十八點，跌幅為百分之七點四。

譚朗蔚、郭思治、陸叔、黃偉豪、黃敏碩（左至右）論兔年股市。

恒指面世以來經歷咗四個兔年，表現好壞參半，其中八七股災最為經典，而恒指喺一九九九兔年卻飆升七成，果然動如脫兔。踏入癸卯兔年，港股首個交易日延續虎年尾市升浪，以全日高位二萬二千五百六十六點收市，並創近十一個月新高。年內「兔」氣能否繼續揚眉？我搵咗七位股評老友，分兩期同大家做個後市展望。打頭陣嘅有香港股票分析師協會副主席郭思治（郭Sir）、寶鉅證券董事及首席投資總監黃敏碩（Michael）、中薇證券研究部董事黃偉豪（Ravi）和富昌證券聯席董事譚朗蔚（Stevan）。
隨住國內經濟活動重啓後，激活內需加速回暖，上月官方製造業、非製造務業採購經理指數雙雙扭轉跌勢，國際貨幣基金組織上周亦將中國增長預測上調至百分之五點二。有見於內地增長勢頭強勁，加上中港通關將助力本地經濟復甦，一班股評朋友一致認同股市整體向好，現正步入牛市一期，預計恒指全年上望兩萬三至兩萬四點水平。郭Sir更為進取，由於唔少傳統藍籌股股價都穩步上揚，指數亦穩守平均移動線之上，佢相信有機會衝上兩萬五點。
滙豐日前發表兔年預測報告，認為首季內地經濟依然脆弱，消費氣氛未如理想，直至第二季起經濟先會有明顯復甦。股市往往提前兩三個月反映經濟，Michael和Stevan指內地通關和放寬防疫嘅消息將陸續被市場消化，預計港股於第二季進入調整期，其後能否再度炒上，仍要視乎內地復甦程度、疫後重建進度、公司業績等是否符合市場預期。
去到國際層面，美國經濟係影響港股重要因素之一。美國債息倒掛已持續約七個月且未見改善，預示當地或面臨經濟衰退威脅，同時裁員潮席捲美國科技行業，美股前景未明下，Ravi相信有利資金流入A股和港股，呈現東升西降。不過Stevan提醒要留意歐美衰退呢頭灰犀牛，目前聯邦基金利率已升至四點五至四點七五厘，雖然美聯儲已放慢加息步伐，但通脹率仍然高企，年內難望掉頭減息，避險需求持續下將利淡美股表現，或拖港股後腿，佢預期兔年恒指會有四千點波幅，可低見一萬九千點，籲散戶謹慎為上。