技術取勝

新冠疫情陰霾驅之不散，非常感激前線醫護、檢測、現場管理以至清潔團隊等日夜努力為我哋把關，但除咗人力，綜觀全球防疫，唔少地方都會借助機器幫手堵截病毒傳播。可以話，創新科技係防疫功臣之一。
例如日本和韓國都有用人工智能機械人送餐、送藥兼消毒清潔。中國工程院院士鍾南山團隊上年亦成功研發採樣機械人，可以統一檢測嘅精準度，亦可以滿足社區大規模需求。美國更加由首宗確診個案開始，已經利用機械人輔助治療。
香港創科界亦發揮創意和研發力量，加入抗疫大軍行列。其中，追蹤患者向來係一大難題，美國約翰斯霍普金斯大學推出疫情互動地圖儀表板（interactive map dashboard），香港亦緊隨研發類似嘅儀表板，展示主要疫情資訊。另一例子係因應社區檢測中心大排長龍，政府同本地創科公司THE GULU合作，提供遙距派籌服務，盡量減低人流和感染風險，市民到場亦可掃描二維碼實時了解最新輪候籌號及餘下名額。
另外，面對海量檢測需求，有本地檢測承辦商香港分子病理檢驗中心（HKMPDC）上個月快速搭建「凱旋號」負壓硬氣膜實驗室，並配備過百部先進儀器，令檢測能力倍增。
Omicron傳播力遠超之前幾代病毒，甚至有確診者疑因九秒相遇而中招，可謂防不勝防，於是促使零接觸經濟應運而生。部分連鎖超市和餐廳一向有用自助點餐和付款機，疫情令呢種不經人手嘅安排更加廣泛應用。德勤上年曾有一份報告，預測全球零接觸經濟之下，單係在家消費市場，到二○二五年可以達到三兆美元規模。
之前亦有提過，各大地產代理行都變陣推出VR虛擬實境睇樓，最近恒基亦為樓盤加設虛擬導覽，希望喺疫情之下推售貨尾。大公司可以投資科技，但香港大部分中小企又如何搵資源應用新技術?有數碼零售業界分享，香港近年出現唔少初創，所研發嘅技術方案可能未夠大科企咁完善，但係創意唔輸蝕，而且更貼合本地場景。疫情之下中小企同初創合作，一方面可用較相宜成本應用科技，對初創嚟講雖然唔係大budget但可以有機會畀佢哋小規模試驗自己嘅產品，更可趁機會攞市場反應，如有未完善之處亦可微調，可以話係雙贏。
想打贏疫仗，作為市民都可以利用科技維持健康，大部分智能手機和手表都設有健康監測功能，記錄各項身體數據，藉此調整日常作息習慣，從源頭減輕公共醫療壓力。例如我早前提過一個「大家減齡」應用程式​​，用戶可以透過健康活動降低生理年齡，同時賺積分用嚟換獎賞或做善事。好多家庭在疫情下所受影響特別大，呢個平台嘅用戶用積分可以捐贈膳食、湯包，甚至支持社福機構為特殊學習需要學生提供特別設計嘅網課。呢類健康行動背後都應用咗好多技術同數據分析程式。
疫情成為創科發展嘅催化劑，以往遙遠嘅科學成為日常生活一部分。希望有更多創科新方案出台，幫我哋技術取勝，擊倒疫情。