擾攘六年的霸王告《壹週刊》誹謗案，法院周一宣判霸王勝訴。高等法院法官判詞批評，涉案報道嚴重損害霸王聲譽，而且「包含個人評論」，不接納被告指霸王用低質原材料生產洗髮用品。相反法庭認同，霸王洗頭水的「二噁烷」含量合符澳洲、加拿大及歐盟要求。

法官批評，《壹週刊》沒有履行報道真相的責任。但法庭同時需避免賠償金額過於「天價」，阻礙言語自由。考慮各因素後，賠償金額由原告最初索償的六億三千萬元，大幅下調至三百萬元。

三百萬雖然唔係天文數字，但法庭要《壹週刊》同時負責霸王八成訟費，計落絕對唔係小數目。

據悉，雙方為打這宗歷來最高索償額嘅誹謗案，都重金禮聘重量級律師團，律師費分別高達五千萬及三千萬元，換言之《壹週刊》為自己及霸王找數，分分鐘接近八千萬元之巨。

其中代表霸王嘅鮑永年，執業三十年，○五年躋身資深大律師行列。近年專攻誹謗法，本港近年誹謗官司幾乎有一半由他操刀。佢亦曾多次受當事人委託，與壹傳媒對簿公堂。

代表《壹週刊》嘅「金牌大狀」余若海，擅長打民事案，幫過政府及城中名人打好多大case。據悉佢今次出手幫壹仔，律師費高達半億。

壹傳媒屢惹誹謗官非，大灑金錢請星級律師團，如果計埋賠償，咁多年來官司錢以億元計。

霸王集團創辦人陳啟源與妻子萬玉華，多年來苦守經營「霸王」品牌，一度因《壹週刊》嘅報道蒙受損失。

黎智英近年捲入政治捐獻案中，佢創辦嘅壹傳媒亦經常被告，是非纏身。

鮑永年（上）代表霸王，對撼《壹週刊》用五千萬請來嘅「金牌大狀」余若海（下），終由霸王得勝。

《壹週刊》現任及時任總編輯黃麗裳（右）、張劍虹，周一回應記者提問，一被問到賠償係咪會構成財政壓力，以及係咪「睇漏眼」，二人便上車離開。

《壹週》拒答財政影響

《壹週刊》總編輯黃麗裳周一庭外話，賠償與霸王追討嘅錢「差好遠」，顯示法官同意今次的誹謗非惡意中傷。但三百萬都唔係小數目，所以會研究係咪上訴。但對記者追問賠償係咪對《壹週刊》造成財政壓力，以及時任《壹週刊》總編輯張劍虹係咪「睇漏眼」，二人均沒有回應便上車離開。

周一，霸王股價一度升近一成，但宣判後倒跌，收市前跌近百分之六。壹傳媒則逆市上升百分之二。

翻查資料，壹傳媒誹謗案纍纍，賠得最「甘」的一次係九八年，同集團《蘋果日報》錯誤報道女律師朱蕭菊圓訛騙客戶，令她飽受精神壓力引致胎兒早產，以及嚴重影響她個人及事業聲譽，《蘋果》須賠償三百六十七萬。

霸王集團由祖籍廣東的陳啟源，與妻子萬玉華創辦。他們八十年代做農藥生意，後來與廣州華南植物研究所合作生產洗頭水。

九五年將霸王註冊為私營有限公司，但一直只屬國內二、三線品牌，直至○五年將產品大革新，大打「中藥世家」旗號，又豪擲四千萬元簽下成龍做代言人，加上鋪天蓋地播放廣告，終於一鳴驚人。

霸王○九年在本港上市後，陳氏夫婦身家暴漲至五十億。翌年，《壹週刊》涉案報道刊出後，霸王股價一日間應聲急挫兩成，市值蒸發廿四億，可說損失慘重。

霸王旋即入稟控告《壹週刊》誹謗。聆訊期間，霸王批評壹仔明知報道內容有漏洞，卻無做好求證責任，反而選擇性報道，損害霸王品牌，令霸王生意一年間無咗接近五億人民幣，要大做廣告挽回形象，多年來經濟及商譽損失高達六億港元。