三位女股評人陳鳳珠（Ellie）、李惠嫻（Hannah）及李韻儀（Sonija），在鏡頭下確實下了不少苦工，對於股票、金融市場評論分析得有板有眼，礙於向來以男性股評人為主導，她們三位從前亦曾遇過有人質疑她們的專業……

陸：好想問吓你哋三位，有無因為身為女性，遇過一啲委屈或者唔公平嘅事同批評？

嫻：陸叔，好記得有一次上司介紹我比人識嘅時候，對方第一句竟然話：『啱喇！請個花瓶嚟咪幾好！』，吓……對方都係頭一次見我，就咁快下定論話我係一個花瓶，我覺得佢漠視咗我背後嘅努力，嗰次我覺得有啲委屈同埋幾hurto架。

珠：我同Hannah一樣，都遇過一啲唔開心嘅經歷。好記得啱啱出嚟做嘢嗰陣，嗰時某雜誌搵我哋當時幾位女股評做訪問，Sonija你都有份嘅，我諗住只係普通閒談式嘅訪問，不以為意就答應咗喇。最記得喺訪問嘅中段，記者無啦啦話不如考下我哋幾條問題吖，但最後篇訪問稿出咗街，內容寫得同我所想嘅落差好大，仲寫埋對我哋每位股評人嘅評分，雖然我喺咁多位女股評人入面得分都算幾好，但我認為佢哋無事先聲明咁做係唔尊重我哋。

陸：Sonija，我都記得你有份做呢個訪問，咁有無因為咁而唔開心呀？

儀：陸叔，我對呢件事就無咩印象，不過我都有為雜誌嘅評論而唔開心，因為咁仲匿埋咗一陣無出席飯局添……哈哈，大約一個星期到啦。可能我係一個比較善忘嘅人，人哋嘅諗法我控制唔到，但我可以控制到嘅係靠自己嘅努力，去開展自己未來嘅路向，其他控制唔到嘅就無謂諗咁多喇！

陳鳳珠（右二）、李惠嫻及李韻儀（左一），向陸叔剖白光芒背後所下的苦工 及種種辛酸，並揚言：「我們不是『股瓶人！』」

陸：咁你哋又有無遇過啲咩困難呢？

珠：唔……都無咩特別困難嘅，主要係每次做訪問或者評論前，準備功夫要做到足，仲有要背好多嘢，連啲數字都要記得好清楚。尤其係喺座談嘅環節，主持人通常問嘅嘢都會好深入，如果準備得唔夠好嘅，到時有可能答唔上，所以平時我睇嘅同背嘅資訊都要夠多、夠深入，咁做好做足準備對我平日嘅工作都好有幫助嘅。

嫻：我贊成Ellie講嘅，因為做媒體訪問即時反應好重要，呢樣嘢唔係靠吹水就得。最重要係你要去做好準備，對嗰隻股份或者嗰個版塊要熟悉，我一直都好努力去做足功課，希望喺節目回應提問嘅時候，可以比到啲reference出嚟，去加強我嘅說服力。

儀：哈哈，我同你哋嘅困難有啲唔同喎，我開始上節目之後，都有人同我提過我有懶音嘅問題，上電視、電台做節目喺咬字上要好清晰，所以我之後就日日返屋企讀報紙練習。依家結咗婚就搵埋老公幫手添，因為佢中文好好，日日我讀社評比老公聽，由佢糾正翻我正確嘅發音。

陸：好喇，三位講完困難，咁不如講吓你哋有無諗點喺股評生涯上位吖？

嫻：哈哈哈，有機會上位我當然開心啦，不過我做節目係用平常心嘅。陸叔，你都知道我哋股評人，其實唔會分咩行業或範疇嘅版塊去講，最好就係各行各業都識，我亦都好想睇多啲深入啲嘅數據資訊，去做財經分析比投資者，因為香港上市嘅股票實在太多喇……

儀：陸叔，如果要做到好似你咁成功，我諗都仲有一大段路。不過我同意Hannaho架，想用多啲時間做研究，但就想更專注喺某幾個範疇度，因為要記晒全部上市版塊嘅資料，實在好吃力吓。而且公司喺分工上都幾清晰，係希望我哋唔同嘅同事，專注調研唔同嘅範疇。

珠：陸叔，自從當初開始接內地電視台嘅節目之後，我就多咗好多機會，亦多咗觀眾認識我，正因為呢種認同感，我o依家會更加努力以赴，更積極上多啲電視台嘅節目，哈哈。

陸：我好想同你哋分享吓，股票市場咁大，股票no.咁多，有好學歷又好，有專業資格都好，股票市場個餅咁大，老餅同新丁嘅股評人，實在真係各有各做唧。o依家投資者年齡嘅層面咁廣，參與股市嘅朋友又咁多，再加上講股嘅平台同渠道又好多，我認為男股評又好，女股評都好，最主要係我哋想發放正確嘅投資訊息比大家。只要我哋聚焦做好應做嘅本份，其實真係無男女之別，更加無長幼之分囉，最重要係勤力做好準備去評「股」，先係我哋股評人應有嘅使命。