邵忠：「我好鍾意做傳媒！」

過去二十年中國經濟快速發展，國內讀者逐漸對閱讀有需求，現代傳播（0072）主席邵忠遂抓緊這機會，在九三年離開安穩的進出口公司，出來闖天下並成功拓展自己的傳媒王國，在一○年更被中國傳媒年會封為領軍人物。廣州出生的他，似乎從小便喜歡上傳媒業，這可能緣起於邵總阿媽在報社工作，所以由細到大他便常往報社流連。之後幫手接管朋友的《現代畫報》月刊開始，至九八年為《周末畫報》進行改革，成功在國內建立其傳媒事業。

陸：大家都知你係國內嘅傳媒大亨啦，但點解當初你會揀做呢行？

邵：大學係修讀國民經濟同統計學，廿二歲畢業後喺廣州政府法改委睇宏觀經濟，八九年我被派去發展鄉鎮企業，當時要學習同了解企業運作，並要由宏觀走向微觀經濟。嗰時嘅鄉鎮企業其實等於香港貿發局，我廿六歲仲做埋署長，後來派我嚟香港，負責睇住國內中小企嘅進出口業務，咁啱之後有機會要幫朋友搞《現代畫報》，就係咁就入咗傳媒呢行喇。

陸：當時中國做進出口業務，係咪一定要經香港做轉口？

邵：無錯呀，陸叔，嗰時我成日仲要留喺香港，搞掂啲中小企業進出口嘅批文、代理、外匯管理等等，百幾個企業要做進出口嘅事，全部都要經我嘅批閱o架。

陸：咁你又點解會染指做雜誌o架？

邵：做咗中小企業進出口無幾耐，我識咗一個廣州雜誌《現代畫報》嘅阿頭，佢叫我落廣告支持吓，但本書嘅版面設計同內容都好唔掂，就算支持佢兩期都長貧難顧吖，所以決定幫佢搞好本書。就係咁我離開咗鄉鎮企業，後來先知道原來我好鍾意做傳媒呢行。《現代畫報》當年仲係屬於阿公，於是喺九二年我就搞咗間民營企業嘅公司，正式做紙媒喇。

邵忠九三年離開進出口公司，由改革《現代畫報》開始，成功發展自己的傳統王國。

陸：當時你又點管理同領導本雜誌？

邵：九十年代初大陸雜誌做到好cheap，香港雜誌就搞得好好，於是我哋套用咗香港雜誌嘅經營模式去做。當年其實有好多外國奢侈品牌，好似LV、CHANEL都希望走入嚟中國，礙於當時大陸嘅雜誌滿足唔到佢哋，咁我覺得呢個係黃金機會。而且我覺得中國將來嘅經濟發展一定好強，外國奢侈品牌嘅需求亦一定好勁，所以九三年開始就全力去搞《現代畫報》。

《現代畫報》本身係月刊，到咗九八年國內開始引入印刷周刊嘅滾筒印刷技術，我就決定將《現代畫報》改為周刊發行，仲改名叫《周末畫報》添。

陸：你同香港咁有淵緣，有無諗過將《周末畫報》引入嚟香港？

邵：我覺得啱大陸未必啱香港，所以無諗過喎，同樣大陸媒體亦好難搞去美國，因為美國經濟同資訊都好發達，而且資訊一定係由第一世界，發放去到第二、第三世界，所以想發展任何文化事業，都同地區經濟嘅發展有好大關係。

媒體發展要靠人口多

陸：九十年代當時你搞嘅《現代畫報》其實都幾前衛，有無遇過艱難？

邵：陸叔，當時國內賣嘅雜誌係無超過三蚊嘅，我哋就賣十五蚊一本，本書仲發行至全中國，所以淨係做百分之零點一都好開心。加上我哋有專責嘅發行團隊，專攻三高人士：高學歷、高收入、高品位嘅讀者群，做咗三年已經有錢賺，仲一年比一年好，我哋先夠膽去做周刊咋。

陸：繼《周末畫報》之後，點解又再搞其他唔同類型嘅雜誌呢？

邵：《周末畫報》係集新聞、財經、生活、娛樂嘅綜合性雜誌，但十年過咗，中國群體就開始出現細分化，所以我哋搞咗針對商業精英嘅《彭博雜誌》中文版，又創辦針對年青女性嘅《優家畫報》。《生活》係針對普羅大眾嘅，《新視線》係針對創意階層嘅讀物。

陸：咁多本雜誌係咪都有啲共通點嘅呢？

邵：我哋一開始就用咗四大方針去做採編同市場定位，第一要國際化，第二要高品位，第三要時尚化，第四要社會深。我深信呢幾個係普世價值，無論走到去邊個世界，內容都要以國際視野為主。高品位同餐廳原理一樣，有檔次唔同嘅各種類；時尚化嚟講喺當時嘅香港一定比大陸高啦，但十幾年之後嘅今天大陸真係追得好快。

陸：你覺得做好傳媒事業，要具備啲乜嘢秘訣？

邵：傳媒大亨梅鐸講過，搞傳媒一定要去人多、兼具人口類別夠多嘅地方去搞。人口基數多嘅地方，對唔同種類好似藝術嘅，潮流文化嘅，設計等等嘅，喺媒體銷量同消費上都會強好多。所以喺澳洲同美國咁地大脈搏嘅地方去做傳媒就當然易啲啦，要喺香港搞多類型媒體讀物，就當然會難啲囉。媒體生存值最終都係講銷量同廣告量，有咗銷量同廣告量，傳媒業嘅發展先能夠健康地傳承下去。（待續）