新世界系價值解鎖
歐美通脹持續高企之下,近日美國聯儲局又再放鷹,暗示今年或加息兩次,意味企業融資成本將進一步提高。面對加息周期,近期本地發展商頻頻出招,繼領展(0823)世紀供股後,上周太古和新世界發展(0017)相繼公布資產重組,向母企出售資產,減磅套現。
新世界今年二月中期業績會上已經預告,並無供股或配股計劃,但會就各業務進行策略性檢討,並透過企業行動提升股東回報。今次周大福企業向新創建(0659)股東提出全面收購,每股作價九點一五元(港元,下同),較停牌前溢價約一成四。新世界作為新創建大股東,持股六成,若要約獲獨立股東投票支持,集團將可有二百一十八億元現金收益,其中四十億元將撥作派發特別股息,換言之仍有近一百七十八億元流入公司,預計完成後淨資產負債率可降至百分之四十二。
新世界可藉重組資產,收復股價折讓,對小股東嚟講係好事。
有市場人士認為呢項交易主要係幫新世界減債,我覺得鞏固財務狀況並唔係壞事,但更重要係未雨綢繆,為未來發展儲備彈藥。集團執行副主席兼行政總裁鄭志剛(Adrian)上年提到,內地房地產市場已見底,計劃斥資一百億元人民幣於上海、廣州、杭州和深圳等城市買地。面對高息借貸環境,新資金可助集團減低利息支出,而睇返集團最新一份中期業績,到期貸款再融資已搞掂晒,目前可動用資金有約九百二十億元,另有近二百億元中港銷售合同將於下半財年入帳,財力穩健。
除咗為集團泵入新現金流,呢項安排亦可釋放企業價值。新世界和新創建業務可謂南轅北轍,前者主攻物業發展和酒店營運;後者涉及收費公路、物流、保險、基建等,兩母子關聯不大,因此長期出現估值折讓。倘若成功重組,可有效釐清兩者定位,尤其新世界可集中發展地產業務。新世界可藉重組資產,收復股價折讓,對小股東嚟講係好事。
至於新創建亦將有股息政策調整,要約指出,周大福企業直接控股後,會對新創建業務營運、資產組合、股息政策等進行審閱,除普通股息外,更擬要求額外派發特別股息,盡量提高新創建嘅總派息,為股東帶來憧憬。
新創建小股東要留意,呢項交易要一段日子至能完成,而由於新創建全資持有富通保險,因此仲要經保險業監管局和百幕達金融管理局批准,期間股市或宏觀環境變動都會帶嚟風險,假如想穩陣啲可考慮把握呢個時機先行套現。
好多人將呢項交易視為將新創建私有化嘅行動,但實際並唔係呢回事,通告亦未有提及要進行私有化。對於小股東而言,最重要當然係股價和股息,因此我認為呢項交易最重要始終係資產嘅合理配置,從而為集團將潛藏價值解鎖。