陳偉健長期在內地工作，漸漸發現內房的發展潛力，他毅然從熟悉的Big 4，由負責核對帳目，轉去內房做財務部揸fit人。從規模較小的金輪天地（1232）做起，之後轉職到時代地產（1233），再後來加入全國二十強之內房民營企業新城發展（1030），出任執行董事兼副總裁，今次他便跟陸叔娓娓道來為何由核數變「睇數」。

陸：你點解會從Big 4轉做內房財務嘅呢？

健：陸叔，其實我係想做Big 4嘅合夥人，但嗰陣成個會計行業已經開始萎縮，所以我未知想點做，又咁啱當時喺南京有個香港人，搞咗十幾年地產之後想搞上市，做Big 4時我已經幫過房地產公司上市，累積咗相關行業上市嘅經驗，更加上他鄉遇故知，雙方都有種信得過嘅感覺，所以決定過去幫佢手，其實佢同我都係摸住石頭過河邊試邊學，不過都好感謝佢畀到咁嘅機會我。

陸：咁你唔做核數轉做睇數有無咩分別呢？

健：做財務部門阿頭要睇公司所有業務嘅財務運作，做內房嘅財務就更加要放眼將來，因部分嘅入帳係將來賣樓嘅盈利。相反，做Big 4核數係事後回顧，無得放眼將來，睇嘅數據亦係已經發生咗嘅業績。不過兩份工作都有一個共通點，就係要對數字好敏感。

陸：講吓你喺金輪嘅工作吖？

健：一一年十月我上任做金輪嘅Financial Controller，要喺大約三、四個月內，將公司由國內標準提升去到國際標準，跟住又用咗一年嘅時間就搞到公司上市，嗰時我哋上市嘅時間，又咁啱撞正另外兩間比較大型嘅內房公司上市，其中一間就係我o依家做緊嘅新城，所以我哋就延後避一避，有時好奇妙又或者命水就係咁，避一避反而令我哋表現更好，嗰陣公開配股差唔多超額認購八十倍，結果好令人滿意o架。

陸：咁你又點解離開金輪呢？

健：我喺金輪好快升做CFO，跟住仲入埋董事局，嗰時我嘅老闆王生成日都同我講，有好機會就要去試，咁我自己都抱住求進步嘅心，畢竟年輕亦都想向外再闖吓，又咁啱有朋友叫我去見吓時代嘅岑生，好記得跟岑生初次見面，就一見如故傾咗整個下晝，第二日岑生就已經畀offer我，其實我嗰陣同另外一間公司都傾到八八九九o架喇，但見到岑生嗰邊成個團隊都好後生，大家相處同發揮應該會更好，所以最終都去咗岑生間公司幫手囉。

陳偉健向陸叔分享他轉行的過程，以及對內房前景的看法。

父母提醒勿得意忘形

：咁其後你又點加入新城嘅呢？

健：一四年我去時代做CFO，咁啱公司嗰時要解決一個危機，我嗰次都吸取咗一個好珍貴嘅經驗，學識咗喺任何時候都要做好風險管理。到一五年，新城邀請我加盟，我見新城係全國二十強嘅民營內房之一，我覺得係一個難得嘅機會，於是就過咗嚟幫手喇。

陸：其實你轉工都算好密吓喎，有無畀人話你好高騖遠呀？

健：父母都有提醒過我「無限風光在險峰o架」，佢哋咁講都係想我記住，升職雖然升得快，但係要跌都可以跌得好快囉，我轉過幾次工無非想攞多啲人生閱歷，嚟到呢刻我就諗，o依家我已經喺一間全國二十強內嘅內房做管理層，都可以話已經攀上我事業嘅高峰，仲有公司嚟緊會全力贊助我去讀芝加哥大學嘅EMBA，令我可以喺我所愛嘅「讀書」方面再深造，好感恩公司有咁嘅安排又咁錫我，所以我會竭盡所能做好當前本分，陸叔，即係話現階段我唔會考慮轉工囉，哈哈哈……

陸：你點睇內房嘅發展前景？

健：我認為o依家嘅內房係處於一個整合期，賣房再唔係做一次生意咁簡單，要轉型去發掘多元化多向嘅服務性行業，賣完樓我哋都要畀多啲唔同嘅after sales service（售後服務），例如為客戶安排埋物業管理服務，照顧到佢哋日常所需，更要為屋苑提供一個生活社區等，我深信呢個係行業內大方向嘅發展。

陸：最後你有咩想同年輕人分享吓？

健：由於我會考考得唔好，中六之後去咗美國讀書，我比同學係讀多咗一年；做Big 4嘅時候，因為跟同事關係麻麻，上唔到位升唔到經理，計落又輸多咗一年，所以我付出咗好大嘅努力，去追番輸咗嘅時間。我寄語年輕人應該要竭盡所能，分秒必爭去做好當前要做嘅事，幸福唔係必然o架，要學識抓緊同珍惜每個機會。