一般人可能認為出生中產或以上家庭的人，其人生多會一帆風順，皆因他們成功靠「父幹」，相比大多數人幸運。但事實上，出身好並不代表你的人生際遇就會順暢。

現任新城控股（1030）執行董事兼副總裁的陳偉健（Kenny），三十一歲時已成為上市公司首席財務官，但他其實並不是一生好彩，也曾嘗過挫折與失敗，但他最終學會男兒當自強。

陸：我知道你本身家庭環境唔錯，家人係咪幫咗你好多？

健：我慶幸屋企人好錫我，由細到大從不用憂柴憂米，家庭狀況都好穩定。至於讀書方面，佢哋亦無咩畀壓力我，可能我一路以嚟都充滿自信，所以佢哋心裏面都覺得呢個仔應該係得嘅。但當我經歷過人生第一個大挫折嘅時候，就知道佢哋其實對我都係有啲期望嘅。

陸：Kenny你竟然都有遇過挫折？

健：陸叔，我中學係讀傳統學校聖約瑟，平時我嘅成績都好OKo架，仲加上一路以嚟我對自己好有信心，咪諗住輕輕鬆鬆去應付會考就OKo架啦。當年我學校會考放榜有個傳統，就係會叫晒嗰屆啲學生落禮堂，由最高分開始叫名去拎成績表。當叫到去廿一、廿分個陣，心理生理我都準備好行出去，點知叫極都未到，就開始有啲驚，去到十五分嗰陣，我頭都抬唔起仲喊咗出嚟，禮堂入面剩翻寥寥可數幾個人，最後十四分叫到我個名，係呀，我會考得十四分咋，呢個分仲喺嗰年好差嘅成績添，唉！最慘就係我放榜前，仲叫父母唔使擔心即管去旅行添，又點知會搞成咁吖……

陸：咁屋企有無人怪你吖？

健：咁又無，不過佢哋同我一樣，都好失望同毫無心理準備。考得咁差簡直係晴天霹靂，仲有對我同父母嚟講，都算係人生第一個好大嘅打擊添。雖然最後我都好好彩掹車邊入返原校，但令我明白到我讀書未夠好，以致之後去美國升學，我就好畀心機去讀書囉。

細有細做　大有大做

陸：咁你喺美國讀完書返嚟就即刻做Big 4？

健：其實喺美國讀大學嗰陣曾主修金融，亦一路諗住做金融，畢業回流就發覺做會計啱自己多啲喎，而且中學時代讀過又都幾鍾意會計。仲記得我返嚟入行就即做Big 4，雖然嗰時月薪得八千五蚊，但撞啱有好多央企同國企嚟香港搞上市，○四到○八年嗰段期間，做IPO真係做到手軟o架！當時大部分時間都係留喺國內，最大得着應該係我多咗機會認識國情，仲可以接觸到內地嘅營商環境，大概做咗五、六年，更見證到會計行業嘅風雲興衰添。

陸：難怪你咁熟悉內地公司嘅營運啦，咁你有無咩啟發同得着呢？

健：嗰時參與嘅好多公司都係由細做起，喺細公司做嘢當然跟大公司好唔同啦，每樣嘢做起上嚟要繁複細緻得多，更因為幫過啲小型公司搞上市，成個上市嘅程序都要識，但我又好開心喺整個流程上攞咗好多實戰經驗。到之後我去大公司幫手，以前喺細公司學到嘅都好啱用，我喺度奉勸各位更年輕嘅朋友，千祈唔好嫌棄間公司細就白白放棄咗個機會。

陸：咁你喺呢幾年嘅工作經驗中，有無發現到自己有咩不足？

健：陸叔，Big 4去到○九、一○年生意開始萎縮，我嗰時可能有啲心高氣傲，與同事嘅相處唔係太好，喺公司亦苦無機會升職。我有搵過當時嘅上司傾，佢就講team work喺一間機構好重要，如果欠缺團隊合作，成件事根本好難會成功。呢件事影響到我去第二間Big 4做經理嘅時候，啟發到我要盡我所能去跟同事相處，喺工作態度上亦大有改變，要盡量運用團隊合作去完成工作，「團隊精神」呢樣嘢我畢生受用，亦係我人生中寶貴嘅第二課。（待續）