全球人才爭奪戰

疫情嚴重打亂全球人力供求，加上人口老化、出生率下降、新世代作息習慣改變，世界各地都出現人才荒，成為另類「長新冠」。而香港人口連續三年下跌，單計上年更錄得約四萬人淨流出，香港總商會日前進行「人才短缺調查」，發現有逾七成受訪企業持續面對人才短缺，並以中低職級嘅情況最嚴重。

要吸引人才長期在港工作並轉化成發展動力，必須打造更宜居嘅生活空間。

人才乃發展關鍵，讀過三國故事都知道，曹操麾下猛將如雲，皆因佢善於引才、育才同惜才，而劉備亦三顧草廬請諸葛亮出山。所謂三軍未動，糧草先行，其實先要有人才至有三軍。面對本地人才流失，聘請外援無疑係最直接、快捷嘅方法。港府大刀闊斧，頒布多項求才令，勞工及福利局繼「高才通」後，上月再公布擴充「人才清單」，將原有十三項專業增至五十一項，最快四星期就能獲批。另外，政府上周亦為建造業和運輸業推出輸入勞工計劃，預計可輸入共兩萬名外勞，以解業界燃眉之急。
雖然門戶打開，但相關配套如何支援，亦係計劃成敗關鍵。四大發展商之一嘅新世界發展（0017），為招攬海外人才，上年特設「來港生活服務平台」，助海外員工、「港漂」和內地專才適應香港生活，服務層面涵蓋住屋、教育、醫療保險等。對於已組織家庭嘅過江龍，除咗着眼於薪酬待遇，更重視work-life balance，故此新世界相關團隊化身親善大使，喺員工抵港前先了解佢家庭所需，安排遊覽香港，及策劃家庭友善活動等。
引入專才只屬緩兵之計，培育本地人才先係長久之策。以往企業招聘往往着重相關工作經驗，不過有見人才買少見少，新世界近年轉向非行內人招手，早前透過為期兩年嘅「Executive Associate」計劃，吸納具一定工作經驗嘅中低職級員工，擴大人才庫。另設立高潛人才培訓計劃，鼓勵各部門唯才是舉，發掘具潛質嘅員工，培訓成為接班梯隊，既能提供上流發展空間，同時可為企業長遠發展早作準備。
大學係本地人才搖籃，唔少大企業都會推出管理培訓生計劃，高薪聘請兼投放培訓資源，培養下一代管理層。以中電（0002）為例，公司近年特設多個實習職位網羅新血，其中見習工程師計劃為期兩年，完成培訓後可獲香港工程師學會Scheme A培訓認證，並有機會晉升為正式工程師。踏入科技時代，中電今年亦新增數碼見習生計劃，學員可定期輪換到不同數碼部門工作，可涉足軟件開發、產品設計和數據分析等領域。
除咗招賢納士，留得人心亦係重要一環。根據瑞士洛桑管理學院（IMD）二〇二一世界人才排名報告，六十四個經濟體系之中，香港排第十一，為亞洲區榜首。不過喺「吸引與留住人才」呢一項則降至二十六位，主要因為本地樓價和房租太貴，令海外人才卻步。
要吸引人才長期在港工作並轉化成發展動力，香港必須打造更宜居嘅生活空間（包括令居住成本更相宜），另外人才公寓、宿舍亦係搶人才配套。