北都成就港創科

香港發展北部都會區，以創科作為焦點，多項土地研究正在進行中，其中一個新發展區「新田科技城」最近展開為期兩個月嘅公眾參與。新田科技城可以話係創科發展嘅核心區，會有三百公頃土地撥畀創科企業，其中會包括龍頭科企，亦有適合初創開展業務嘅園區。
我個人覺得，發展創科產業，覓地甚至造地發展固然必須，但更重要係組成企業集群（cluster），至能匯聚動力。全球最成功嘅創科集群當然係美國矽谷，當地能夠起飛，有歷史因素，亦同本身嘅地理優勢有關，及有名校科研支撐，組成產業群後能夠吸引最頂尖人才，以及大量風險投資，彼此環環相扣。

新田科技城展示項目資訊。

而新田科技城嘅地理位置同深圳只係一河之隔，假如配合方便嘅過關政策，比香港其他創科園地更適合同深圳合作發展。深圳近年成為內地創新創意之都，創科發展成績有目共睹；而香港本身亦擁有難以取代嘅優勢，例如同國際接軌嘅成熟金融系統、完善法制、世界名列前排嘅高等學府等，可以同深圳互補而達到集群效應。
參考二○二二年《全球創新指數（GII）》，瑞士、美國、瑞典雖然名次有變動，但繼續成為全球最創新經濟體三甲，地位穩固。中國排名升一位，排第十一；香港保持第十四位，但同新加坡相比仍然相差七位。不過，假如比較集群排名，「深港穗」蟬聯世界第二大創新集群，可見協作發展嘅威力。
隨住十四五規劃將香港定位為國際創科中心，近屆港府着墨於創科相關政策，如放寬「科技人才入境計劃」、設立「產學研1+計劃」及研究喺大埔創新園建立第二個先進製造業中心等。上年《香港創新科技發展藍圖》更訂明目標，要喺五年內吸引至少二十家龍頭科企來港設立或擴展業務，務求激活本地創科引擎。
要搶人才、搶企業，完整嘅創科生態系統至關重要。矽谷、北京中關村科技園區等，能夠羅致上中下游科企，實現虹吸效應，形成產業生態圈，都係當中成功例子。新加坡喺二○一六年亦提出落實裕廊創新區，預留六百公頃土地打造先進製造業樞紐，包括人才培訓、研發及未來工廠等主題發展，目前已吸引到現代汽車、西門子、英偉達等跨國企業進駐。
香港過去成功發展為國際金融中心、商貿之都、航運樞紐；邁入新經濟年代，我哋應該再下一城，落實「南金融、北創科」雙引擎。根據發展局近日公布嘅發展大綱圖，新田科技城連河套區佔地超過六百公頃，其中三百公頃為創科用地，可容納七百萬平方米總樓面面積，規模相當於十七個科學園。而有別於數碼港和科技園嘅單一發展模式，科技城將興建新田市中心，提供約五萬個公私營房屋單位，另有生活配套同文娛康樂設施，希望建立一個職住平衡嘅宜居社區。我期望今日講創科，不久未來見到港創科茁壯成長。