健倍苗苗多管齊發
大家關注傳染病威脅嘅同時,美國眼科學會一份研究報告預測,到二○五○年全球將有近半人口患上近視,會成為日後嘅公共衞生問題。報告指東亞地區,包括香港嘅近視率特別高,我自己都係十歲就開始戴眼鏡。香港小朋友戴眼鏡好普遍,中大幾個月前發表一項研究結果,評估每晚使用亞妥明0.05%對預防近視嘅功效,經過兩年研究,顯示喺四至九歲冇近視兒童中,同安慰劑相比可以使近視發生率顯著降低,由百分之五十三降至百分之二十八點四。
亞妥明係健倍苗苗(2161)旗下品牌藥,用於為兒童預防和控制近視,係香港同類眼藥品領先品牌。但見到公司截至二○二三年三月底止年度業績,亞妥明銷售額較前下降,首席執行官黃一偉解釋,主要原因係疫情期間眼科診症人次大減,因此影響相關眼藥品銷售,相信喺復常之後銷售可隨之而增。
健倍苗苗首席執行官黃一偉(右)。
疫情令消費習慣大大改變,二○二二年香港網上消費按年增加逾兩成;對於藥品和保健品同樣大有影響,好似通關後本地藥房生意雖有好轉,但仍未能回復至疫情前水平,原因係內地消費者多咗購買渠道可以選擇,包括用手機購買。
健倍苗苗亦加速發展電商業務,喺二○二一年上市時已建立自家網上平台,目前喺天貓和京東自營旗艦店,上一財年電商收入有十幾倍增長,而且見到成績繼續攀升,例如天貓平台最高七級評級,公司自營旗艦店現時係六級,流量表現良好。其中特別係止痛、退熱等家中常備藥品,銷量長期處於榜首位置。
公司上財年收益按年增長兩成八;上半年表現已經唔錯,下半年通關後銷售更加飆升,其中對業績貢獻最多係品牌中藥板塊,分部收益按年增逾五成四。據黃一偉分享,公司中藥品牌喺市場上一向熱賣,其中何濟公和保濟丸更加係周圍都搶貨,中間甚至出現缺貨情況。新冠疫情令藥品需求增加,而由於病毒株XBB.1.16其中一個病徵係肚瀉,保濟丸一向係腸胃藥品嘅領先傳統家用品牌,因而掀起熱賣,上財年保濟丸銷售按年增長百分之一百二十六。
健康保健品業務方面,公司今年三月收購一間合營公司餘下五成股權,成為全資附屬公司。呢間公司喺零售方面擁有優勢,特別喺連鎖店有較強銷售渠道,亦有好多推廣員,對健倍苗苗旗下其他品牌有協同效應。公司開發嘅田心日辰和修腩專家已經納入健倍苗苗保健品牌組合內,相信有助呢個分部擴大營收。
內地消費者一向對中藥品非常接受,健倍苗苗一直致力發展大灣區中醫藥業務,包括透過跨境電商平台開拓銷售,上財年內地收益已經升至佔總收益兩成六。隨住廣東省政府公布簡化流程,畀合資格傳統外用品牌中藥向廣東省藥品監督管理局申請註冊,公司旗下十靈油和鎮痛霸活絡油已經獲批,相信可於短期內推出市場,未來增長勢頭可期。