旅遊業疫境變陣

本港多項檢疫措施大鬆綁，出入境限制亦逐步放寬，港人爭相報復式外遊，冰封三年嘅旅行社出現久違嘅人龍。尤其喺剛剛過去嘅長假期，港人旅遊意欲急增，根據入境處統計，上月聖誕假期間，機場單日出境人次連日突破兩萬。我自己都飛咗去日本，現時喺中北部深度遊睇雪景，過一個白色短假期。
我出發去日本過程順利，不過之前因應內地疫情升温，日本、泰國和韓國等旅遊熱點相繼加強入境防疫措施，其中日本政府於上月底更一度要求中港澳航班僅可往返成田、羽田、關西和名古屋中部四個機場，六萬名香港乘客大受影響，其中約四千人為旅行團旅客。

陸叔到日本過一個白色假期。

限航令突如其來，由宣布至實施只得三日時間，旅客最怕有機去、冇機返，滯留當地。主打日本團嘅東瀛遊（6882）隨即拆彈，公司執行董事禤國全（Steve）早前同我憶述，新規例出台倉猝，員工馬上兵分多路，聯絡航空公司安排「吉機」接載北海道嘅旅客，同時協助其他團友轉乘內陸機回港，將滯留情況減至最低。
至於去程方面，由於一月適逢旅遊旺季，東瀛遊有超過五千名客人報咗日本團，受影響地區旅客佔逾半，計劃均被打亂。幸好經港府連日爭取，本月初日方逐步撤銷多項限制，包括可降落所有日本機場，並容許航空公司恢復部分日本航班。不過Steve坦言，由於載客航班增幅仍受限，加上日本地勤員工人手不足，航空公司短期難以回復已取消航線，亦只能有限度增加班次。
回顧過去各地封城鎖國嘅日子，旅遊業長期處於懸崖邊，香港旅遊業議會上年統計，疫情期間有三百多間旅行社結業，逾二百名員工嘅大型旅行社則削至四間，其中有五十六年歷史嘅康泰旅行社亦不敵疫情而清盤。
能夠喺業界支撐至今，除咗考驗財力，更要靈活變陣。東瀛遊過去出團，同各地食品手信供應商都有聯繫，於是疫情後開拓零售業務，推出網購平台「EGL Market」，同時將分行打造成零售實體店，售賣各國特產，市場反應不俗，更為業績注入動力，上年中期呢項業務收入約一千萬港元，佔總收益三成七。另外，為開拓本地客源，公司積極推出Staycation、本地一天遊、公海遊，又同航空公司合辦「Flycation」，為多間中小學舉辦空中畢業遊，喺機上頒發畢業證書和進行致詞儀式，確有諗頭。
人才向來係旅行社嘅重要資產，東瀛遊全盛時期有六百名員工，雖然經歷三年低潮期，但由於新業務拓展，可以減輕無薪假和裁員壓力，上年年底仍能留住一百六十名員工。目前全球旅遊業漸見曙光，公司正部署重啟招聘，冀今年第二季團隊增至三百人，以準備重拾境外旅行團業務。
不過Steve提到，疫情後部分從業員已經轉行，除咗香港，全球航空、酒店和零售等旅遊相關板塊都面臨勞工不足問題，故此佢預計要到二○二四年旅遊業至能回復疫情前狀態。「搶人才」係各行業首要任務，東瀛遊先「留人才」，復常之路相信會比較平坦。