真的假得了

早前金管局連出幾篇新聞稿，提醒市民注意偽冒滙豐、恒生同創興銀行嘅欺詐網站。事實上，由於偽冒通訊和網站猖獗，銀行已經唔會向用戶發出包含連結嘅短訊或電郵，更加唔會要求客戶收到訊息後登入連結，提供敏感個人資料。
今年第一季香港錄得超過八千八百宗詐騙案，佔整體罪案四成，增幅達六成半；其中投資騙案有逾八百宗，涉款達四點八億港元。投資騙局往往牽涉假冒網站、社交媒體帳戶、短訊群組等，我本人近日亦不斷收到朋友傳嚟Facebook截圖，問係咪我嘅帳戶。原來有假冒我嘅帳戶出廣告帖文，仲日日留言噓寒問暖，因此能見度甚高。

假帳戶猖獗，陸叔在官方社交媒體一再發澄請聲明。

早前上Facebook用我個名搜尋，搵到十幾個陳永陸帳戶，用埋我張相，部分仲有簡介。類似假冒事件喺二○二○出現過，經過一輪澄清和報警備案漸漸平息，但最近再出現兼變本加厲。其中一個假陸叔帳戶用龐寶林同女兒，以及我嘅三人合照，宣傳一個炒股社團，仲話名額有限，快啲加入。呢個社團已經有近兩萬成員，龐兄已即時通知證監會備案，表示同佢完全無關係。
另一個假陸叔帳戶就用我同侯鈞翔醫生嘅相，聲稱我開咗一個全「免費」嘅股票群組， 又係名額有限，快啲加入之類，仲話其他收費嘅都係騙子。又有一個sell溫情，用一張我同朋友嘅相，話係粉絲聚會，帖文亦有我訪問明星嘅相。
通常見到呢類帳戶都會舉報，但媒體唔一定會刪除，有一段時間我亦日日喺電台節目內澄清，但仍不能杜絕偽冒。因此長氣啲喺呢度講多一次，我個人並無任何社交媒體帳戶，短訊群組只限工作或同朋友約下食飯，亦無開股票群組；唯一喺Facebook嘅官方帳戶係電台節目「人生交叉盤」。如有陸叔add你，真係要提高警覺，若帖文或短訊有連結更加唔好click。
有記者放蛇留言畀呢類群組嘅「陸叔」，對方回應「晚上好，請問係咪來學習股票投資嘅朋友」，又話「每月都會布局3至4隻優質上升股畀fans購買」。佢推介嘅係一啲成交量唔太大嘅股份，要求記者買入後截圖傳畀佢，等佢指示幾時沽。記者相信假陸叔係氹人幫佢托住股價，等莊家出貨獲利。騙徒手法層出不窮，但萬「騙」不離其宗，有行為科學家拆解騙局嘅三大心理技巧，包括時間迫切性、假冒權威或值得信任嘅人或機構，以及貪婪心態。提防方法都係問返自己一個基本問題：「係咪好到太唔真實（too good to be true）」？
身邊好多股評都畀人假冒，估唔到一啲從事其他業務嘅朋友都中招。有朋友家族經營老牌兌換店，佢講笑話公司嘅Facebook得幾十個followers，但一個假冒佢嘅帳戶竟然有幾千人追蹤，真係要學習下點樣增加粉絲。假群組有時會播我講一兩句說話，應該係由電台錄嘅，而隨住深偽技術（deepfake）日趨成熟，視像都可以做到好像真，大家要加倍小心。