兔年仍有反覆求穩進

恭喜發財，我陸叔祝願各位《東周刊》讀者身體健康、心想事成、鴻運當頭。經過兩年多新冠疫情折騰，香港可謂百廢待興，而隨住內地慢慢復常及對香港通關，香港抗疫措施亦逐步放寬，睇牌面我哋最關心嘅中港兩地經濟有望走出谷底。每年我都會請好朋友玄學名家羅奇峰（Raymond），以另類角度同我哋把脈，睇下今年係咪可以否極泰來，走進一個好運嘅兔仔年。

羅奇峰認為香港已逐步走出谷底，但首要打穩本身基礎。

陸：大家一直期望內地通關可帶旺香港，你從玄學角度去分析，中港今次疫情後復常，會唔會重回昔日光景？
峰：陸叔，今年《地母經》開宗明義已寫出「太歲癸卯年，高低半憂起，春夏雨雹多，秋冬缺雨水，燕趙好桑麻、吳地禾稻美，人民多疾病、六畜瘴煙起」，反映今年整體仍要面對不少天災、疾病及人禍。事實上，今年正正係八運交接九運最後一年，仍屬反覆之流年，要回到高峰要一段時間。不過，我睇流年會用多幾個參數，其中一個係《皇極經世》嘅年值卦，而今年嘅卦係「風火家人」。
陸：你所講嘅「風火家人」卦係咩?可唔可以同大家講多少少？
峰：「風火家人」原本卦意係講述治家之道，指家中有賢慧女主治家有方，男方可無後顧之憂在外拼搏。如套用於流年解讀，大意係戰亂後要先重整家庭，以家先行；當一切安頓好，有咗穩定嘅家庭基礎，才可對外進取。由此可見，儘管中港通關，我哋仍要先行固本培元，至會逐步向好，切忌一步登天。從另一角度去睇，因為世運交接所引動，今年世局仍會有「黑天鵝」出現，所以先搞好本身根基，仍係今年穩中求進嘅金科玉律。
陸：聽你咁講，今年整體嚟講仍然係穩中偏好嘅流年。不過，中港股市已經一早復常，過去兩個月港股更跑贏全球，如果以你上述嘅判斷，港股會否已反映利好因素，今年部署係咪要保守啲呢？
峰：或者咁講，如果以香港嘅「七政四餘」星盤去睇，二○二二年可以話係香港近年最差一年，原因係上年出現一個木星直接尅土宮嘅現象，但隨住離開二○二二年嘅行度，香港已逐步遠離最差嘅時間。加上今年「癸卯」年的「癸」水係香港回歸八字嘅用神，對香港經濟及股市係有利嘅，而且會有新資金流入。不過，今年嘅立春八字以「癸」水為日元，周邊五行以木火為主，而整個大局係「財重身弱」；簡單嚟講，即使表面遍地黃金，但仍會有意外令你失諸交臂，所以，即使看好都要控制注碼。如果有幸喺上年底食到港股升浪，立春後可以套利部分，如果夏天時有一個較明顯嘅調整，可以再儲貨，切忌盲目樂觀去推一鋪大。
陸：你都啱嘅，小心駛得萬年船，而且我都相信大病初癒，穩陣出擊係合適嘅策略。總之，我再祝各位投資得心應手，萬事如意。
峰：我都祝大家股匯亨通，一本萬利。