電子利是派得環保

農曆新年將至，今年可以實體拜年，大家派利是都派得疏爽啲。過年前見到銀行排晒隊唱新鈔，新年大家想除舊迎新，呢點都可以理解，金管局除咗呼籲大家用「迎新鈔」之外，更鼓勵市民經轉數快派電子利是，仲出埋首Rap歌同賀歲Stickers大力推廣。
派電子利是除咗環保，仲可以自訂好意頭銀碼，加埋個人化祝福，更加可以派埋畀海外親友，好處甚多。各大金融機構見到商機，亦紛紛推出優惠搶客。四大銀行滙豐、恒生、中銀、渣打都推出咗電子利是，其中滙豐更加入動畫電子利是功能，派利是可以發送動畫。而用恒生「派e利是」App有機會抽足金財神和財神NFT，渣打e-利是亦有抽獎，中銀就透過支付平台和手機銀行提供「Phone利是」服務，配埋電子利是封。
內地方面，微信喺二○一四年已經開啟電子紅包功能，據報道當年年三十晚發送量「僅」有一千六百萬次，到二○二二虎年春節微信紅包封面領取總數超過三點八億個，帶有封面嘅微信紅包收發總數超五十億個。支付寶、百度、新浪等亦加入戰場，連中國人民銀行上年都推出數字人民幣紅包，藉此帶動消費。

陸叔同大家拜個早年。

過去香港人想派利是畀內地親友多用微信紅包，但上年「港版支付寶」AlipayHK開通向內地支付寶發紅包嘅新功能，香港用戶派港元利是，內地親友連結銀行帳戶會收到相應金額嘅人民幣。疫情下跨境利是甚受歡迎。
香港人派利是鍾意用款式特別嘅利是封，內地電子紅包更加有個人專屬和藝人封面，不過原來特別嘅紅包封面要搶至有，微信甚至做咗一個「紅包封面鬧鐘」小程序，提醒用戶領取封面。
華人社會大多有派利是習俗，新加坡喺疫情之下亦有更多市民派電子紅包。新加坡金融管理局近年鼓勵民眾用電子紅包，除咗減少銀行排隊換新鈔，仲大量減少印製新鈔嘅需求，更加環保。疫情期間亦可以避免人潮群聚，有助防疫。
電子紅包同全球非現金交易趨勢息息相關，根據麥肯錫報告，二○一八至二○二一年間，全球非現金零售交易複合年增長率為百分之十三，而新興市場增長更達到百分之二十五，其中增長最快係非洲和亞洲。報告點出幾個具有創意而廣受歡迎嘅電子錢包功能，如倡導環保嘅G-Forest，鼓勵用戶儲GCash種虛擬樹，然後平台會代種同等數量真樹。而內地電子紅包亦被指有創意，報告估計二○一八年時，微信和支付寶紅包共有八億用戶。
企業派開工利是都可以電子化，中銀香港虎年推出電子利是企業服務，可以一次過派一萬封利是畀員工。上年六成用戶係資訊科技行業中小企，今年銀行再推優惠和加強「拆利是」體驗，希望能吸引其他行業採用。當然，各銀行自己都帶頭利用電子渠道派利是畀員工。
有環保組織估計香港每年用三點二億個利是封，我都希望能夠藉着電子利是減低碳足迹，最後借金管局首Rap歌歌名祝各位「鴻兔大展」。