![](http://eastweek.my-magazine.me/tmp_images/article_images/74811/b9d541719a1db58fef2d64ec0357034c8fd1547f.jpg)
傳承與開創
亞洲創業家較傾向將企業一代傳一代,即使公司已上市或加入其他股東,仍望子女能接手管理,以保留家族傳統和企業文化。不過繼承祖業不代表只守業,有分析將企業傳承劃分為六大資本,包括累積落嚟嘅行業經驗、財務資本、人才、家族人脈、社會影響力,以及經營智慧。「繼承者們」能夠好好把握呢六種資本,就可以做好傳承與開創。
同前海香江金融嘅劉根森(Sam)傾偈,我發覺年輕一代對於家族企業傳承有自己諗法,希望開拓新業務板塊,不過過程當然有風浪。Sam畢業後在二○一三年為家族開創金融業務,當時由集團挑選合適人才過來,開始做過渡性貸款和自營證券交易,中間有賺有蝕亦有壞賬。一、兩年後,公司拉上補下蝕少少,但係佢思考公司嘅營運模式,覺得呢種短期和波動性大嘅業務並非長久之策。佢坦言由於自我壓力大,當時有啲迷失,但係一位員工提醒佢,公司如果無方向,團隊會有離心。
一番話警醒咗佢,於是佢修正策略,重新建立能夠長遠發展、規模能做大,而且就算佢唔睇實,團隊都可以自行營運嘅業務模式。首先,佢諗融資點樣可以做得安全和規範?佢見到國家高度重視中小微企發展,但係內地中小企借錢難,借錢貴,難以發展。於是Sam諗到由家族集團嘅供應鏈入手,一來為實體企業提供微貸符合國家經濟利益,政府會支持;二來集團對上游公司有應付賬,等於有抵押在手,對下游公司做盡職審查亦較容易。建立新業務平台後,Sam亦開始組織自己嘅團隊,加強風險、流程和制度管理,令公司走向更規範發展。
至於投資和基金管理,見得到Sam不斷進步,而佢經常掛在口邊表示感恩嘅,係同佢亦師亦友嘅鄭志剛(Adrian)。呢位新世界集團接班人跟Sam好投緣,經常提點佢投資前分析要深入,唔可以單睇報告,要實地考察更重思考,不然賺到錢都係luck唔係skills。Adrian碰到合適嘅股權投資項目亦揾埋Sam參與,兩人拍住投入DayDayCook日日煮、百味堂、MTR地下鐵中國連鎖奶茶店等。
現時香港公司Futec International和香江金融集團主要業務係結構性融資和投資,旗下香江證券已取得證監1、4、9號牌,香江資本亦攞咗6號牌,成為全牌照金融機構,兩公司都已有收入,今年開始大展拳腳。公司現時管理投資公司和幾個基金,規模共200億人民幣,其中包括有地方政府作為有限合夥人嘅基金。貸款方面,由最初幾千萬到今日20億人民幣規模,依家更加攞咗互聯網貸款牌照,今年有信心將規模翻倍。公司二○一七年業績完成率達到200%。
Sam回想剛畢業時以為自己好叻,雖然父母無畀壓力,但自己好想快啲有成績,因此創業初期受到挫折其實係好事,令佢好快作出反省。今日做到一定成績,父親有無讚吓佢?原來當面未讚過,不過有朋友話劉父在其他人面前係有讚佢嘅。至於佢業務上遇到困難又有無同父母講,佢笑話講啲唔講啲啦,自己解決到嘅都想自己應付。家族企業傳承,家教比家底更重要。
![](http://eastweek.my-magazine.me/tmp_images/resources/74811/1.jpg)
前海香江金融控股集團有限公司創辦人兼董事長劉根森(Sam)(左)認為,