健康有價

經合組織在二○一七年衞生概覽中提到，35個市場經濟成員國家中，25個人口平均壽命超過80歲，整體平均係80.6歲，其中日本及西班牙最長壽。長壽嘅主要原因之一係醫療開支增加，經合國家平均每人每年醫療開支達4千美元，其中美國更高達1萬美元，總體開支佔GDP約9%。睇數字，健康到底無價定有價？

好多研究都發現健康與財富有關聯，呢點唔難理解，因為較富裕階層有能力負擔更好嘅醫療、食物和保健品，但係《下個富翁就是你》（The Millionaire Next Door）作者湯瑪斯．史丹利（Thomas J. Stanley）卻指白手興家嘅富翁都有相同之處，就係擁有較健康嘅習慣，例如平均每晚瞓7.5小時、每周運動3.5小時等。姑勿論有雞先定雞蛋先，健康與財富關係密切，又同樣重要，呢點毋庸置疑。

一位我多年前聘請入行嘅朋友劉卓衡，當年佢剛畢業，今日已經係擁有三十多年經驗嘅金融專才。去年佢加入一間上市公司茂宸集團（0273），任職茂宸金融董事總經理。同佢傾開，原來茂宸嘅業務正正係建基於健康及財富呢兩個板塊，令我大感興趣。公司透過一連串併購，金融服務已涵蓋資產管理、證券、貸款、私人銀行、財富管理和金融科技，除咗香港並已在中國內地、台灣、澳洲、日韓美加等地設立公司，並正進行收購一間設於列支敦士登嘅私人銀行。喺香港，公司擁有超過30年歷史嘅茂宸證券，茂宸集團亦收購咗一間老牌獨立財務顧問晉裕，令金融服務更完備。

眾所周知，醫療產業嘅門檻高，增長較有保證，其中內地市場嘅發展空間尤其龐大，二○一五年人均醫療花費佔個人收入9.4%，比較美國19.7%仍有好大距離。茂宸嘅健康醫療業務，就專注於當中最具潛力嘅生育和母嬰健康相關產業，相信二孩政策之下會更有發展。配合呢個發展方向，公司在二○一六年收購生殖醫學機構寶德醫務和勝利輔助生育所。兩間公司由有「生仔聖手」之稱嘅香港生殖科權威何永超醫生創立，併入茂宸之後會積極捕捉大中華地區嘅「母嬰童」醫療保健市場機遇。

另外，公司投入資金，成為一個以色列醫療基金嘅基石投資者，希望將基金在生命科技方面嘅技術產業化，補充中國醫療健康市場嘅技術缺口。

與生育、生命相關嘅母嬰童業務系統包括投資於澳洲奶粉生產商Blend and Pack、高端食品營養品品牌Wattle Health，以及中國三大母嬰童零售商愛嬰島，由生產到零售一條龍。我早前就即日來回澳洲墨爾本參觀奶粉廠，其中印象最深刻嘅係佢哋採用濕摻和技術，有別於一般廠嘅基本乾摻和方法，更能保存奶粉內嘅營養。

公司在二○一七年七月改名為茂宸集團，新管理層大力推動三大業務，朝健康及財富方面發展，而同年中期業績嘅虧損亦顯著下降。健康唔止有價，仲好有投資價值。