Happy Dining
見到杜汶澤擔任「金牌飯局」嘅嘉賓，你哋大概都知道呢一晚比平日嘅飯局，氣氛更加熾熱，阿澤同電影《人間喜劇》導演陳慶嘉，兩位同樣幽默，有佢哋在場，點會有冷場？
所以，我挑選咗位於銅鑼灣呢個人氣地帶嘅「鳥羽」作為今晚嘅飯局地點，我哋一邊歎住名古屋特色料理，一邊摸住酒杯底談天說地。
今晚我同阿澤（左）、阿嘉（右）歎名古屋料理，有幾happy？你有眼見啦！
擦出火花
《人間喜劇》係阿澤真正擔正演出阿嘉作品，佢話：「阿嘉話同我合作，話咗好耐，佢成日都係打電話嚟叫我客串一、兩組戲咋！今次佢開到聲，我梗係義不容辭啦！
「而且我同阿嘉都係鍾意即興創作嘅藝術工作者，同佢合作，除咗係啱key之外，好多時反而係佢要求我每個take交番同一樣嘢，呢個對我嚟講先至係真正嘅高難度動作，因為每一次我個feel都有唔同吖嘛。不過，我都會盡量做到佢嘅要求嘅。」
阿澤繼續表現佢嘅生鬼本色，都話有佢冇冷場啦！
我知道阿澤已經茹素幾年，所以特別安排咗一啲無肉菜式畀呢位素食者，佢一邊品嘗，一邊再講佢喺戲中嘅拍檔王祖藍：「祖藍係演藝學院出身嘅專業理論派，同我呢啲打慣街頭即興爛仔交嘅人好唔同，佢嘅演繹，以至角色心理上嘅層次，分分鐘每個變化都有個學名。但係偏偏咁樣先會有火花出現，我覺得我同佢嘅對手戲，大家嘅交流係好互動，而出嚟嘅效果亦都比預期好。」
哈哈哈！跟住阿澤同阿嘉仲邀請我去睇佢哋部戲嘅首映添！我看到港產喜劇愈發矜貴，自然應約捧場啦！
八丁味噌雜錦關東煮（$68）有蒟蒻、雜串等材料，配合名古屋料理嘅特色味噌，一絕！
炸腐皮溫泉蛋（$45）以腐皮包蛋後再炸，極考時間掌握功力。
吉列佐賀豚肉串（$88）採用頂級豚肉炮製，夠香口，佐酒一流！
秘製名古屋炸雞翼（$58五隻、$94九隻）係「鳥羽」招牌菜式，不可不試。
真正港產
講到真正嘅港產喜劇，阿嘉有感而發，「近年嚟香港同中國嘅合拍片多咗好多，唔少喜劇都會放眼喺大陸市場，搞到部戲嘅笑料，冇咗以往嘅味道。今次我申請咗政府資助，承擔咗電影三分一嘅製作成本，情願冒少少險，都想拍番一部自己鍾意，香港人睇完又會笑嘅戲，於是就有呢部戲嘅出現。」
阿嘉嘅創意、心思就好似我哋手上嘅刺身一樣，時刻保持新鮮，係不可多得嘅電影人！
喜劇一向係阿嘉嘅拿手好戲，今次佢冒險自資，都揀咗喜劇片種，並唔係因為唔熟唔做，佢話：「呢幾年香港嘅外在環境，好似政治氣候同經濟都麻麻哋，所以我拍呢部喜劇，只係想話畀香港人知道，無論個世界有幾咁唔好，我哋仲可以揀一個樂觀嘅角度去做人，笑容就已經係解決問題嘅最佳方法。」
哈哈哈！講得太好嘞！而且我可以話畀大家知，阿嘉並非得個講字，佢連電影布局，都加插咗編劇，即係王祖藍飾演嘅角色，「祖藍嘅角色藍本係嚟自我一個編劇朋友，而阿澤飾演嘅殺手，就係我嘅自我投射，亦都有啲似香港電影，感覺上有的遠離群眾。而且兩個主角都好有夕陽工業嘅意味，都有孤獨嘅。」
天婦羅名古屋扁烏冬（$85）所採用嘅扁烏冬，質感有啲似意粉，帶出另類風味。
特上雜錦刺身（$590）有赤貝、甜蝦、三文魚、頂級Toro、帶子等新鮮刺身，鮮又甜。
鮮有破例
阿嘉借戲抒發情感，我當然感同身受。不過，今晚嚟得「金牌飯局」，就唔使太過感性，既然情感已經抒發過，我哋就要乾一杯慶祝啦！乾！
而阿澤喺茹素以外，連杯中物佢喺呢兩年都絕不染指，呢一晚佢特別為我破例，「Paco，我唔飲酒，唔飲唔畀面嘅酒！我好多謝你喺4年前以友情價放Stephy畀我拍《破事兒》，你出到聲，我一定畀面！乾！」
哈哈哈！阿澤佢做每件事都咁有熱誠，唔好話幫唔幫，只係我有能力協助吓嘅，我係義不容辭嘅，That's what friends are for，為友情，我哋乾！
既然阿澤破例同我對飲，我自然無任歡迎，呢一刻，係今晚嘅高潮所在！
名古屋特製燒鰻魚飯（$128），可以一飯兩食，除咗平時嘅食法，仲可以加入以魚乾、昆布炮製嘅上湯，一試泡飯感覺。
今晚我嘅特別推介，係呢個軟殼蟹牛油果卷（$120），菜式普通，真正表現出師傅嘅功力！
阿澤茹素，我就同佢分享呢個好有特色嘅薑汁沙律啦，哈哈哈！
同聲推介
我同阿澤傾吓講吓，大家嘅話題又再返回電影，仲講到最近大家嘅心頭好，先發現我哋不約而同都好欣賞佐治古尼（George Clooney）主演嘅《寡佬飛行日記》（Up in the Air）。我就話呢部戲係佐治古尼從影以嚟演出得最出色嘅作品，阿澤大表認同，仲補充話：「我同彭浩翔都嚴選咗呢部戲為09年最佳電影第1位，Jason Reitman（導演）拍親嘅都好掂，今次你以為佐治古尼為個女人肯安定落嚟，就有happy ending咩？佢就話你知個女人原來有老公仔女，個轉折位好有驚喜，好真實。」
啱晒！真實，帶出晒男人嘅感慨！
我同阿澤惺惺相惜，唔嚟一個擁抱又點可以話到畀大家知我哋嘅交情呢？
