尋找隱世泰鮮味
「金牌飯局」一向為你哋搜尋特色美食，今次我就發現咗佐敦有一間泰式「泰肥牛海鮮菜館」，海鮮極之鮮美，我一試難忘之外，仲特別邀請施念慈（Celia），帶埋佢旗下嘅至top model李莉琳（Liz）、陳靜（DaDa）同蔡瑩瑩（Ivy），分甘同味。
我敢講，呢間泰式菜館，位處鬧市，但極之隱秘，有好嘢?我點會唔同你哋分享呢？
「泰肥牛」以新鮮海鮮作為主打，我梗係要率領一眾嘉賓Liz、Celia、DaDa同Ivy（左至右），親自試吓即燒海鮮嘅鮮味。
闢健康模路線
係，我相信你哋一見model呢個字，自不然會聯想到o靚模，但係身為老闆嘅Celia就澄清：「冇錯，佢哋喺年齡上都可以稱為o靚模，不過喺形象上，我諗佢哋同一般嘅o靚模就有一定嘅分別，我見到好多o靚模都會以性感衣着加惹人遐想嘅甫士，務求一下就『深入民心』，反而忽略咗健康形象，亦都會令人有誤解。
夏日炎炎，DaDa（右）就為我奉上消暑嘅紫菜肉碎湯。
咁多位美女為「金牌飯局」破酒戒，我點會唔向佢哋介紹我嘅心頭好呢？
「於是我要求我嘅model要入得屋，無論幾歲嘅小朋友，或者係幾十歲嘅長者都可以欣賞到佢哋嘅寫真集。性感，係可以嘅，但係就唔好令人有不必要嘅遐想、聯想，健康最緊要！」
哈哈哈！咁我哋今晚食泰國菜就啱晒嘞，食辣加快新陳代謝，同Celia旗下嘅model一樣健康！當然，我亦藉今次飯局，聽一聽新一代嘅夢想，近期DaDa人氣旺，就由佢開始！
「我都覺得Celia講得好啱，健康嘅性感係好重要，更重要係咁樣會令我哋嘅模特兒路可以走得遠啲，始終性感只係等同新鮮感，唔長久，希望我哋可以比其他人做得更好。」
難得DaDa咁有遠見，啱㗎，不論從事邊個行業，最重要係find your position，find your way，即係搵到你嘅定位，從而搵到屬於你嘅成功路線圖。
如果愛清淡口味嘅，大可試一下呢個紫菜肉碎湯（$105），足料！
冬陰功大頭蝦湯（$138）係泰國菜館嘅考牌作，而呢一個，好得立即過關，pass！
親炮製醉香焰蝦
而今晚一眾美女光臨「金牌飯局」，我哋除咗交流吓成功之道，飲食之道亦不得不提，Liz話：「我好鍾意食泰國菜㗎，特別係冬陰功湯同生蝦，呢度嘅冬陰功大頭蝦湯，味香濃而大頭蝦就夠鮮甜，我要添多碗！」
一講飲食經，我同Celia（中）即刻講唔停，而Liz（左）則一邊品嘗美食一邊細心聆聽。
Celia（右二）親自下廚，令一眾model DaDa、Ivy同Liz（左至右）大開眼界。
哈哈哈！我推介嘅，一定有番咁上下水準啦！不過，我冇挑選生蝦作為今晚其中一道嘅菜式，因為我要一眾嘉賓品嘗呢度嘅招牌菜「泰肥牛香焰蝦」。經過大廚嘅講解後，Celia仲自動請纓，親自炮製呢個以中國白酒烹調嘅招牌菜添！
「我不嬲都有自己下廚嘅，不過就係煮家庭小菜或者西餐多啲，今次可以煮畀大家試食，感覺梗係唔同啲啦！」
我現場所見，Celia揸起鑊鏟姿勢熟練，甚有功架，喺佢完成「作業」後，我就帶頭向佢舉杯致意，乾！
呢個燒活鮮拼盤，有黃酒麻香燒花甲（$58，12隻）、生猛海龍蝦（$48一隻）同生猛鮑魚（$48一隻），味味新鮮。
Celia友情客串炮製「泰肥牛香焰蝦」（$168），中國白酒配合秘方香料，酒味恰到好處。
謝絕靠緋聞上位
喺即將舉行嘅書展，DaDa同Liz都會推出健康嘅寫真集，而早前捲入緋聞嘅Ivy，就會於「下集」登場，「雖然因為緋聞會有多啲人知道有我呢個model，但係我唔會藉呢啲周邊新聞上位，亦唔會講男方任何壞話。始終我都係有我自己嘅實力，要藉助呢啲方法出位，未免太過睇小自己嘅潛在能力。」
哈哈哈！有guts！咪睇今晚嘉賓位位都有弱質纖纖嘅外形，其實位位都真人不露相，祝3位model各自尋找到佢哋嘅天空，乾！
品嘗過一頓豐富嘅鮮味晚宴，我同一眾美女即刻簽名留念。
咖喱蛋白大肉蟹（$308），辣味突出，蟹就新鮮甜味，又一力讚之作！
燒頂級澳洲和牛（$308）係令一眾model驚喜嘅作品，佢哋異口同聲話估唔到泰國菜都有和牛歎，夠多元化！
呢個香杧糯米飯（$38）嘅特別之處，在於糯米同黑糯米係罕有地混合上場，一啖有晒軟硬感覺。
多元化嘅仲有秘製海南雞（$78半隻，$148一隻），一次過試多國特色菜式。
