狗年暢旺
人人都想年年暢旺，而講到趨吉避凶，今次「Paco巨星飯堂」就誠邀著名堪輿學家李丞責，大談來年運勢。有個猛料專才坐鎮，我邀請兩位影壇武打新星Chris Collins同楊柳青（小青），請丞責贈言。
我帶三位嘉賓，去到位於觀塘嘅「孔夫子」，品嘗特色山東菜，了解催旺運勢嘅秘訣，順風順水過狗年。
我每年都會邀請丞責（中）擔任嘉賓，率先預告來年運勢，亦請佢向Chris及小青贈言，令我哋個個旺住過狗年！
多面改革
即將踏入狗年，我一定要請丞責博士大談來年運勢，佢話：「狗代表誠信、忠心同固執，明年將會係大改革嘅一年，以香港嚟講，教育同房地產都會有新制度、新方案。」
講到2018年嘅整體運，佢話：「出年係改革年，好多嘢都好創新，同現有制席有啲背道而馳，有去舊迎新嘅景象。最厲害嘅，應該係教育制度，會有翻天覆地嘅改革；香港人最關注嘅房地產，亦都會有新方案，所以等買樓嘅人士，將會有機會上車。」
而我最關心嘅娛樂，尤其係電影，究竟有咩新商機可以發展？「娛樂事業通常睇西位，因為西位屬金，代表廣告、宣傳、口才表演等。
「雞年係爭執嘅年份，來年西位出現『二黑』星，『二黑』同神秘、第六感、鬼神及妖怪之類嘅題材有關，所以拍呢類題材會比較受追捧。睇吓到時有咩需要，我都可以粉墨登場『扮鬼』o架！」
我帶三位去到位於觀塘嘅「孔夫子」，品嘗特色山東菜，了解催旺運勢嘅秘訣。
丞責嘅新作2018狗年運程《汪汪發財》，正在熱賣中。
千層素鵝（$42），以腐皮包裹已炒香嘅菇絲、甘筍絲、金菇絲及西芹絲，先煎香再以齋湯蒸煮，健康美味。
酥皮茄子（$42），茄子先沾上蛋白漿再炸脆，配上自家製南乳汁，香脆惹味。
珊瑚藕卷（$88），薄切藕片極考刀功，捲住混合馬蹄粒嘅豬肉餡，口感爽脆。加入鹹鮮甜酸五味俱全嘅珊瑚汁，更具風味。
虎有財運
睇完香港同娛樂圈嘅整體運，梗係要丞責贈兩位嘉賓幾句！喺美國出生嘅Chris，曾為當地海軍陸戰隊服役九年，九六年來港拜師學詠春，佢仲精通拳擊、巴西柔術及菲律賓魔杖（Filipino Kali）等，係多名藝人嘅教練，小青都跟佢學功夫。
Chris屬虎，今年已經喺《殺破狼．貪狼》中大顯身手，嚟緊喺電影《臥底巨星》中，又大戰Eason。丞責就表示：「肖虎比較獨立，係一個獨行俠，虎、牛、蛇及豬稱為『四驛馬』，呢個生肖本身比較靈活同反應快，無論從事運動、跳舞，甚至拳擊、武功都特別有天份。來年虎、狗、馬係三合，貴人屬馬，屬虎本命流年出現『三台星』，三台星即位列三公，似頒獎台嘅三級，只要努力必能喺頒獎台上冠亞季軍佔一席位，而且正財運不錯。
「不過因『官符』、『五鬼』同『指背』，官符代表官非、口舌之爭，『指背』代表篤背脊，小人比較多，兩樣都要提防，『五鬼』令佢幻想比較多，但都有利創作性，而『地煞』代表投資房地產易有失誤，故不宜置業。」
小青同Chris喺狗年都有機會大展拳腳，師徒二人自然全力以赴。
Chris喺《貪狼》同Tony Jaa打得精采，嚟緊喺《臥底巨星》又同Eason交手，工作不斷。
孔門烤豬件（$138），自家烤製孔門烤豬，以秘製香料調味，外皮卜卜脆，肉質嫩滑。
銅盤生焗鱔飯（$128），先用銅盤蒸出優質綿滑米飯，已起骨嘅嫩滑鱔肉，配上秘製甜麵咸魚醬，鮮味更為突出。
孔門牛肋排（$328），先將重大約一公斤嘅美國牛肋排炸香，再以醬燒方法烹煮兩小時，然後泡浸一晚，令其鬆軟及更加入味，入口即溶，令人回味無窮。
貴人助兔
至於現年三十歲嘅小青，〇六年開始做模特兒，又曾任節目主持，到一四年開始學功夫。雖然嚟緊佢以演「打女」為目標，但喺《溏心風暴3》嘅佢，就暫時唔使施展武藝，只需要同黃宗澤談談情，佢嘅武術造詣，就留待喺即將上映嘅作品《洩密者》同《入鐵籠》發揮。
我與小青同樣屬兔，李丞責表示：「兔本身要求好高，喺狗年有『月德星』，同女性緣份好，如果男性更精采，桃花非常之旺！尤其係農曆七至九月，所謂『月到中秋分外明』，喺呢個時段發揮特別大，成功機會更高。
「但要注意，因為有『小耗』星，唔多唔少要使啲錢，要化解嘅話可以做善事、捐贈或作遠線投資，如果有財務上問題，就要盡快解決。」
屬兔嘅朋友仲有貼士o架，明年着綠色可旺財運；穿紫色或黃色，就有助人緣。
丞責嘅星級客戶不絕，近日連荷李活紅星化妝師Charlotte Tilbury（上小圖），都請佢指點迷津。「Charlotte對中國文化一直好有興趣，早兩年佢透過朋友翻譯，睇過我嘅運程書，發現嗰兩年講佢嘅嘢全部好準，就開始想見我，尋求一啲攻港同喺內地發展嘅意見。」
小青有份演出重頭劇《溏心3》，同時佢都冇鬆懈操練，狀態top fit。
艷影蝦球（$148），蝦球沾蛋白漿炸至脆身，配蛋黃醬及濃縮檸檬汁調製嘅自創醬汁，酸酸甜甜，份外開胃。
陳皮燉雪梨（$48/位），先將雪梨去皮去芯，加入陳皮及桂花糖燉兩小時，清香潤喉，秋冬最啱食。
孔夫子
地址：觀塘駿業街58號3樓
電話：31033833
