大堆頭789
「金牌飯局」開局以來，今晚呢個嘉賓陣容，係史上最大堆頭嘅，點解？因為周麗淇（Niki）、周國賢（Endy）、小琳同野仔齊齊喺7、8、9月有重大搞作，所以我就一次過同9位嘉賓，歎住港式私房美食，傾吓飲食之道。
4個單位分別喺7、8、9月推出唱片，推動香港廣東歌樂壇，由佢哋講港式飲食之道，最啱！
史上嘉賓最強大嘅一次，九位後生仔加埋我，仲唔係十全十美？
親民厚蛋治
稱得上係大堆頭嘅嘉賓陣容，我自然要同每一個單位嘅嘉賓好好交流吓飲食之道，而今晚我所挑選嘅飯局地點，係位於香港島心臟地帶銅鑼灣嘅「尚樓」，最啱一大班酒腳或朋友開party（詳見後頁）！今晚咁開心，我哋先乾杯，為今晚嘅飯局揭開序幕，乾！
Niki身材瘦削，點知原來咁食得之餘，仲對香港地道嘅「茶走」咁有心得添！
我先同即將喺9月出新碟嘅Niki暢談佢嘅推介，「我鍾意食呢度樓下嘅『香港大牌檔』㗎，個厚蛋治同茶走係我必食之選。首先講吓個厚蛋治，蛋同麵包嘅厚度比例係1比1，一咬落去嘅口感係好豐富、好rich，一邊食一邊會有一種好滿足嘅感覺。
「至於茶走，因為佢唔用淡奶，用煉奶代替，我又唔使落糖，好健康咁歎到香滑嘅奶茶。有時同朋友講起，我至發現有唔少人都唔知道茶走係乜嘢，其實呢一款熱飲，代表咗最地道嘅港式飲食文化，所以我一定要藉呢次機會，大力推介吓。」
哈哈哈！Niki對推介茶走嘅熱誠，同佢對自己嘅事業一樣咁有heart，我都趁今晚嘅飯局，請你哋多啲留意藝人為自己銀色旅途所付出嘅努力，唔使太在意其他花邊新聞嘅！
椒鹽雞軟骨（$39），抵食到極！
懷舊煎釀三寶（$39），風味絕佳，食過翻尋味！
上湯勝瓜浸花甲（$78），清甜中帶鮮味，其他地方食唔到！
自家老火湯
我一邊歎住茶走，一邊又請小琳（即胡琳）公開一吓佢嘅養生之道，「我好鍾意煲老火湯㗎，通常我都會喺網上搜尋一啲湯水秘笈，再自己炮製嚟滋潤吓，最近天氣比較熱，我就搵咗一個冬瓜湯嘅食譜，煲老火湯嚟墜吓火。
野仔六子食飯最緊要講氣氛，不過有咁滋味懷舊菜就當然更good啦！
「除咗煲湯之外，我仲會焗吓曲奇、焗吓蛋糕，有好多啱啱相識嘅朋友，都估唔到我係鍾意下廚㗎。」 哈哈哈！睇唔出走型人路線嘅小琳，原來隱藏一顆廚神的心，連我都呃埋，唔乾唔得啦，乾！
另一邊廂，野仔6子對飲食就比較隨意，阿占做代表，「其實好多時我哋同一大班朋友食飯，食嘅係個氣氛，至於食咩反而係其次，知己聚埋一齊，就算食大牌檔都冇所謂啦！」
胡琳外型新潮，原來煲湯有一手㗎！
秘製黃金雞（$78），睇樣已經知好食！
蒜蓉開邊蝦荷葉飯（$108），夠特色，家陣好少酒樓有得食喇！
爸爸煮涼瓜
哈哈哈！就好似今晚咁，我哋一行10人喺「尚樓」飯局，氣氛熾熱，就如同與知己聚首有異曲同工之妙。而Endy（周國賢）身為3子女之父，對飲食亦有另一番見解。
「我好多時都會揀一啲有機嘅蔬菜，對自己對小朋友都健康啲。我自己好鍾意食涼瓜，就咁生炒加一啲鹽，仲可以辟走涼瓜嘅苦味，食起上嚟仲甘甘哋添！依家小朋友仲細，等佢哋大個啲我都會叫佢哋食多啲涼瓜。
「我睇過一篇報道，話北海道有一個鎮，專出產涼瓜，而嗰個鎮嘅居民，就長期以涼瓜作日常餸菜，佢哋連命都長啲㗎。」
今晚人人嘅飲食之道，都有獨特之處，我祝佢哋喺事業上再創高峰，人人有breakthrough（突破）！乾！
周國賢原來都係食家一名，對涼瓜仲有特別喜好添！
鑊仔乾炒牛河（$36），河粉入味，牛肉乾身爽脆，正！
咁大堆頭嘅陣容，除咗金牌飯局，仲有邊度搵到？
包場開Party
今晚我哋喺「尚樓」包場聚會，大歎餐廳獨有嘅私房菜外，同時仲可以品嘗到「香港大牌檔」嘅港式美食。如果你同朋友，人數超過6個人，又想擁有一個私人party嘅氣氛，留下perfect moment，都可以學吓我，每位價錢都係由$220-$380，快樂無價！
