王明凡：「企業發展首重人材」

中國香精香料（3318）於一九九一年創辦，並於二○○五年十二月在香港主板上市。由貿易生意轉而成為集研發、製造及銷售於一身的香精香料企業，經過二十六年的用心打造，中國香精香料不但是行業的龍頭企業，也進級成為深圳民企五十强之一，陸叔今次請來創辦人兼主席王明凡分享其成功創業路。

中國香精香料創辦人兼主席王明凡指調香師入門門檻最高。

陸：明凡兄，你未建立中國香精香料企業之前係做咩行業？

王：陸叔，我哋家族原本喺茂名經營海產品，八四、八五年深圳係最早發展嘅經濟特區，我同二哥就決定一齊闖天下，又好彩畀我哋轉行做咗貿易生意，兼代理一個外國知名添加劑。

陸：咁你哋係幾時先開始代理香精香料？

王：貿易生意大概做咗四、五年都做得好好，咁啱喺八五、八六年間識咗一個做外貿嘅老總，喺佢穿針引線下開始大搞香精嘅生意，主要代理食用同飲用嘅香精，當時代理嘅品牌好似芬美意、奇華頓、法國曼氏等都係我哋名下，而且仲係當時出名嘅百年名牌香精嚟添。

陸：你哋喺八十年代做貿易生意有無難度？

王：嗰時中國改革開放生意非常好做，又可能唔係人人做到貿易呢行，因為一定要有入口許可證，我哋好好彩一早辦理好咗所以可以做。

陸：咁你哋當時公司點運作？

王：主要係將送到香港嘅外國進口貨，運返嚟深圳做銷售，因為中國對進口貨需求好大，所以生意好好，我哋一年可以做到幾億生意額。

陸：八十年代做到幾億生意額都唔簡單，不如分享下你哋有無咩難忘嘅回憶？

王：哈哈，最開心搵咗我哋嘅第一桶金。

陸：既然做貿易生意做得順風順水，明凡兄點解你又會開廠做生產商呢？

王：我哋開廠真係一個偶然嘅機遇。九一年嗰時有位政府領導嚟深圳同我哋交流，佢同我哋講，雖然我哋貿易生意做得好好，但將來會越嚟越難做，鼓勵我哋諗新方法去搞長遠計劃。記得佢當時講「中國要有工業、實業先能夠建國」。嗰時生意收入雖然可觀，但佢呢句說話深深打動咗我，加上當時政府大力鼓勵大家做工業，又以優惠價批地畀我哋建廠，阿哥同我於是決定向創實業、辦好持續發展呢個目標進發。

陸：做代理生意同做廠完全唔一樣，喺好多方面你哋都要顧慮到同安排好。

王：係呀，貿易只不過係一買一賣嘅生意，係非常簡單嘅營運模式。

陸：好彩你哋一開始有政府扶持，搞工業都應該幾順利吓？

王：陸叔，我哋一直做開貿易，但去到要睇住同管理成間工廠，由設備、安裝、人才培訓等等大小事情，我哋都唔識而且要重新出發。初頭可以話舉步為艱，一路蝕錢。嗰時二哥甚至想放棄，將廠賣畀人就算。可能二十九歲嘅我仲年青，心裏面又有團火，既然已經投入咗成二、三千萬去建廠，點都想希望搞好間廠，無理由咁輕易就話放棄。

陸：咁嗰時你哋咪工廠、貿易兩邊生意一齊做？都咪話唔辛苦喎。

王：九三年我哋就從貿易嗰邊退落嚟，因為八九年之後國家更加開放，唔再單靠深圳做進出口，最後決定唔做貿易，專心做好工廠。

陸：啱啱提到間廠初期一路蝕錢，咁係喺幾時你先開始有錢賺呢？

王：一路捱到九八年左右先開始有盈利，之後一直都做得唔錯。一開頭之所以做得唔好，係因為大家都習慣買開外國進口貨，又點會無啦啦想轉去買中國嘅新丁品牌吖。

陸：就算家，中國貨好多時都畀唔到信心消費者，何況以前。咁你哋當時有無做咩改革？

王：做貿易時已經留意到煙草買賣嘅利潤好高，所以建廠後，我哋請到國營煙草商嘅頂尖調香師李慶龍過嚟公司，佢將調煙草香精嘅技術帶到我哋度，令市場慢慢接受到廠嘅產品。後期佢除咗重點發展我哋嘅煙草技術，仲幫手培育相關人才，我哋由嗰時開始步入佳境喇。

陸：人才無論喺創業抑或持續發展中都好重要，中國香精香料嘅成功就係一個好嘅例證。

王：我認為人才喺整個企業發展過程中最重要嘅，李總咁多年嚟都樂於兼培育唔少調香師，協助帶領我哋公司走上高峰。

陸：你認為年青人點先可以入行呢？

王：我哋團隊家有成四百位技術人員，其中有研發香精嘅基礎研發員、會調出最好味道嘅調香師，同埋研究食品製作嘅應用工程師，當中又以調香師嘅入門檻最高。

陸：咁你哋係點請到呢啲人返嚟？

王：我哋家大約有五十位調香師，調香師呢個行業係行師徒制，佢哋都係由李總培育出嚟。每年我哋都會喺大學招聘人材，好多時約見上百個畢業生，不過最後通過測試合格做到調香師嘅可能只得一個，可以話係百裏挑一o架。