康敬偉︰「屢敗屢戰 成功非僥倖」

科通芯城（0400）董事長康敬偉（Jeffrey）， 看準未來社會是以「智能」生活（smart living）為主導，憑對追夢的堅持，不斷從錯誤失敗中學習。今期與陸叔續談集智能硬件、創業者與製造業者（B2B2C） 於一體，與所有用戶共享經濟的社交平台——「硬蛋」（Ingdan）。

陸︰Jeffrey，幾經轉折科通芯城終於成功喺香港上市，你點睇香港呢個市場？

康︰陸叔，科通芯城啱啱嚟香港上市嗰陣業績唔差，不過大家唔理解，又唔係好信我哋呢個商業模式，唔識點估價就用咗成長率做估值。

陸︰咁係因為當時你哋與一般嘅互聯網業務唔同。

康︰不過好彩去年中國開始講互聯網+，我哋就成為典型嘅案例喇。後嚟互聯網+更開始廣泛被接受，就有好多尤其係大陸投資者嘅查詢，佢哋對呢個行業好有信心，仲希望投入資金喺我哋度，只可惜受制於深港還未開通買唔到。

陸︰你哋唔揀去深圳創業板上市，有無咩特別原因？

康︰A股當時嘅規則唔啱我哋，互聯網+嘅着眼點唔應該只係睇現況。

陸︰咁你哋有無咩發展時間表？

康︰雖然硬蛋未賺錢，我哋希望都可以做到一個較公平嘅估值，所以除咗提供現有產品，仲會增添雲服務、軟件、保險等，憑值一帶一路嘅國家政策，將整個行業同消費模式改變。

陸︰所以深港一開通對你哋喺資金上一定會有幫助。

康︰陸叔，誠你貴言。

陸︰不如你介紹吓硬蛋？

康︰ 硬蛋喺二○一三年底孕育出嚟，將成千上萬嘅創新企業拉上嚟呢個平台，將智能硬件、創新創業者，以至製造業鏈接起嚟，如果有製造業嘅人睇中你嘅產品，佢哋會聯絡你，幫你生產。

陸︰即係話智能硬件將會係新一代互聯網生態系統中重要一環。

康︰哈哈，今日嘅傳統企業要靠創新，升級做智能硬件企業，如果唔變就好快會被淘汰。我哋成立硬蛋係想幫有意創業嘅人，連繫銀行、製造商、媒體、創投公司等喺呢個平台上。

陸︰咁o依家有幾多人用硬蛋呢個平台？

康︰我哋o依家有一萬多家喺中國做智能硬件嘅創新公司，有六至八千個製造業供應商去服務創新公司，仲有八百萬粉絲群喺到服務創新創業者，物聯網項目亦都超過幾千個，硬蛋係一個B2B2C嘅一站式社交平台。

陸︰呢個商業模式似乎好多人都有做喎？

康︰分別係我喺二○一三年已準確預測中國智能硬件嘅發展，科通芯城仲喺呢幾年積累咗大量客戶，於是變咗做硬蛋供應商，數據庫嘅資源係要慢慢累積，數據亦唔係話有就會有。

陸︰你哋有無咩發展藍圖？

康︰今年目標係將硬蛋延伸至二線城市同海外，例如韓國、日本等，做成一個連接全世界嘅中國企業，好似網上版一帶一路，將中國製造業產能推向全世界。

康敬偉說：「五年後，我要做到至少大過千億規模嘅製造業電商平台。」

陸︰有無諗過五年後你哋會想發展成點呢？

康︰五年後我哋想做至少大過千億規模製造業嘅電商平台，做國家最大嘅高端製造業班子。我成日同投資者講，如果我哋唔投資新硬件，科通芯城可以更賺錢，但既然孕育咗硬蛋，就要好好栽培呢個BB。呢個行業嘅亮點，係要睇將來同埋睇持續發展，o依家雖然未賺到錢，繼續投放賺返嚟嘅資源，我哋就有機會做大市場同份額，繼而就有機會做全世界最大嘅社交電商。

陸︰你有無諗將呢個BB獨立上市呢？

康︰畀資本市場去估值硬蛋，繼而投資者投放資金畀硬蛋，唔使再用自己嘅資源，當然時機同市值規模最好配合得到，我哋當然想所以都有諗過o架，哈哈。

陸︰想問下你覺得香港年輕人與深圳年輕人喺創意上有無分別？

康︰我覺得創意無分國界，喺咩地方都唔係問題，無論香港深圳都好，兩地有創意又想創業嘅人材慶幸唔缺。不過創業嘅成本好高，雖然政府有錢，資本市場亦都有錢，但資源往往去唔到創業公司。

陸︰咁年輕人又點先可以創業呢？

康︰無論邊度嘅年青人都係一樣，我覺得創業一定要有積極態度同決心，讀大學只係提高個人素質，所以我哋o依家就係做緊幫創業者減低成本嘅事，畀我哋嘅粉絲識得分析邊啲產品受歡迎。好彩喺我哋平台上，有好多夢想家同好叻嘅製造商，如果你環保做得好叻，就可以喺平台上去搵環保產品去做分銷，就係呢個經濟共享嘅商業模式，正好連繫同幫助創業者夢想成真。

陸︰最後我想恭喜你哋好快會被納入為恆生綜合大中型股嘅成份指數。

康︰多謝陸叔，呢支強心針會令科通芯城嘅團隊更加有決心同積極去創建夢想。