甄子之名 少爺占
趁着十月底舉行的三場個人talk show《他爸的少爺占》，少爺占（甄子康）決定升呢為「老爺占」。
「其實我身邊啲同事同朋友，都叫咗我『老爺』呢個朵六、七年，所以都唔知係咪『升呢』，定還是應該係『都唔知乜嘢呢』，哈哈哈！咁啲藝人通常都係改吓啲花名，就會有另一個新生命咁o架嘛，即係好似劉德華都畀人叫『劉華』啦，咁我咪諗住試吓用『老爺』呢個朵橫行吓江湖，睇吓個運又會點囉，哈哈！」
告別「少爺」，除了因為要「改運」，也因為他一年多前多了爸爸這個身份。所以，在這個騷中，他既會邀請多位嘉賓，回顧自己的「少爺」年代，亦會分享自己當父親後的湊仔日常。
「其他人做talk show，好少講私人嘢，但我哋諗到，既然碧咸咁型，佢抱住個女都係咁型o架啦，咁我咪唔介意講我自己嗰啲湊仔嘢囉——其實呢啲嘢我之前唔係唔想講呀，只係冇人問囉，哈哈哈。」
縱使他依然說話冇厘正經，但查實，爸爸這個身份，的確令他改變了——至少，在這個訪問中，他近乎有八成時間，都把囝囝甄和天掛在口邊。
日日新鮮
少爺占的囝囝甄和天（Timmy），去年四月十九日出世，現在已經一歲零五個月大，識行識走，識對一切所看到的充滿好奇了。
「佢o依家最得意嘅地方，係每一日都覺得所有嘢好新鮮。譬如話一對拖鞋，其實日日都係着住嗰對，但係佢每朝一見到，都仲係『嘩！』哈哈哈！對住屋企部電視，佢又係成日會指住：『嘩！』有時仲要一日驚喜幾次，瞓咗覺，起身見到，又會繼續指住嚟『嘩！』好似同你講：『呢部電視真係好特別呀！』你都咪話，農曆七月，有時都幾驚o架！哈哈哈！」
除了懂得四圍「嘩！」之外，囝囝也懂得說一些單字了。「好似佢有時會無啦啦對住姐姐揮手講『拜拜』，咁我哋全部人就要跟住佢一齊同姐姐講『拜拜』，哈哈！
「其實我最初都有教佢叫我屋企隻狗女Miu Miu做『姐姐』，所以佢之後每次喺街見到啲狗，就會指住嗌：『嘩！姐姐、姐姐！』哈哈哈！後尾我真係請咗個姐姐，我唔想佢指住姐姐又叫『姐姐』，指住隻狗都係『姐姐』，我就教佢叫番『Miu Miu』，點知個音太難發，佢叫咗『ma ma』，即係見到媽媽又係叫『ma ma』，見到隻狗又係叫『ma ma』，一係死姐姐，一係死媽媽，好好笑o架！哈哈哈！」
「我同阿奴（當奴，左）喺嗰晚talk show都會唱番『I Love You Boyz』啲歌o架，你知啦，我哋啲歌雖然係陳年，但hit到咁喎，有乜理由唔唱先，係咪？」係喎。
第三年舉行「口口笑」talk show《他爸的少爺占》，少爺占形容這是回顧兼告別「少爺」年代的第三步曲，之後便會升呢變為「老爺」。
突然大咗
他說，自己和太太並沒有特別記得囝囝是懂得叫「媽媽」先，還是「爸爸」先。「佢成日o依o依哦哦，都唔知佢講乜！我諗都係差唔多同步啩——話時話，其實我都唔知佢認唔認得我！哈哈哈！」就是孩子踏出的第一步，他亦沒有視為歷史性時刻。「佢識行，係一個過程，唔係淨係話踏出一步咁囉。其實呢啲我老婆會清楚啲，因為佢有影低。」
反而令少爺占感動至深的，是一次泊車經歷。「嗰次我只係放低咗佢同媽咪喺架車前面，我就揸番架車退後入個車位，當我一踩油，佢就望住我想喊，好似驚我會走咗去咁，我當時一路退後咁望住佢，覺得自己好似死咁呀！直情係『遙遠的她，不可以再歸家……』嗰啲，但其實我一泊好就落車，只係三秒鐘、踩一吓油嘅事，同一呎嘅距離咋喎，不過我見到佢咁，我嗰吓真係幾感動囉！
「老土啲講句，我o依家每日都想時間過得慢啲，因為有時度佢啲手掌、腳掌，嘩！點解突然間大得咁快嘅？以前只係一粒咁咋嘛，o依家已經係咁大隻啦！」說時，他以手指在掌心做了一個長度的比劃。
去年四月十九日，少爺占與太太Tina（冼燕珍）結婚八年後，終於榮升為父母，誕下了囝囝甄和天（Timmy）。「我老婆話，個仔出世之後，佢人生嘅第一份工先至真正開始。」
