滄海一聲笑 林俊賢
「哈哈哈哈……」林俊賢在整個訪問中的笑聲，幾乎比答的更多。
回頭已是百年身，相隔廿載再次亮相香港幕前，他早已由昔日男神，變成了一頭銀髮的型佬；從前他不是演幹探，就是富家子弟，今次客串電影《燈塔下的戀人》，卻是飾演澳門富豪，「亦即是Stephy（鄧麗欣）個老竇……」緊接着是他一陣冷笑，加少少反白眼。
事實上，活了五十四個年頭的他，所經歷過的一切，也足夠寫成劇本：他曾經爆紅過，在七年內主演了六齣劇集和十多部電影；又試過因為股票，數年間輸掉兩次身家；與前妻所生的女兒，以及跟前女友誕下的兒子，都是分離多年後才重聚……「其實呢啲嘢都唔係好勁啫，哈哈哈！」這回他笑得有點尷尬。
曾經滄海，他現在已擁有自己傳媒公司兼當上基金管理人，重提過去，百般滋味在心頭，複雜得太難描述，笑聲對他來說，大概就是最佳的回應。
甲乙丙丁
林俊賢出身於中產家庭，小時候居於北角二、三十層高洋樓，父親是澳洲領事館的商務專員，母親為全職家庭主婦，他是家中長子，對下還有兩個妹妹和一個弟弟。父母思想開明，讓他成長得無憂無慮，亦讓他中學時期可以盡情打籃球，打到入港隊甲一。「我中一嗰陣仲好矮，上堂要坐最前啲位；跟住中二開始打籃球，一打就高咗八吋，成五呎八、九，要坐到最後，哈哈哈！然後中三打到入咗社隊，中四入咗校隊，中四尾就去咗甲一嘅青年隊打工商盃，仲攞咗冠軍，嗰陣我已經有六呎高！不過打咗一年就冇打落去。」
攝於十七、八歲時，當時的他（右）雖然瘦瘦削削，但已有六呎高，外表甚青澀。
讀完中五，他當過信差、繪圖員和售貨員等，直至八二年，他報考無綫藝訓班，與周星馳、梁朝偉、吳鎮宇、歐陽震華和關禮傑做同學。「都係因為嗰陣我細路仔，鍾意發吓明星夢嗰啲囉。我爸爸冇反對過我o架，一來、我冇屋企負擔，二來、佢覺得我只要肯做嘢，唔係顧住玩就得o架啦，哈哈哈。」
畢業後，有的獲安排當上兒童節目主持，有的則在劇集裏做茄喱啡，他是後者。「《香城浪子》做『同學甲』，跟住唔知邊套古裝，我又做『侍從乙』，唉，總之『甲乙丙丁』我都做過晒！」
男兒本色
如是者過了兩年，他索性轉當模特兒，及後，他又參加了新秀。「即係黎明嗰屆。」他以張國榮的〈黑色午夜〉參賽，至三十名選十五名時便被否了。「一否咗入到後台，有人就問我，以前係咪無綫，叫我過兩日返公司傾合約。可能佢哋同華星抽籤揀人啩，哈哈！」
跟無綫簽約後，他即受力捧，第一齣參演的《男兒本色》便當男主角，結果爆紅，電視劇和電影一部接一部，九三年，他更曾出過唱片。「出過一張國語、一張廣東話，嗰陣興又做戲又唱歌o架嘛。」但適逢四大天王冒起，他的歌唱事業無以為繼，惟有繼續拍劇、拍電影，一直至九四年，他突然選擇退出娛樂圈——是因為跟當時的中英混血女友奉子成婚嗎？
九二年，林俊賢拍無綫台慶劇《巨人》，與那時當紅的花旦陳玉蓮拍檔。
「嗯……私人事情啦！哈哈哈！」他忽然表現得有口難言。「其實嗰陣咁啱啲約滿晒，咁我都想停一停嘅。」據悉他們那時是在英國旅行期間匆匆簽紙註冊的。「係囉，係囉！都幾匆忙o架，哈哈！嗯……其實當時都有記者朋友知道嘅，我都有承認：『係呀，我結咗婚！』不過就唔知我有埋小朋友囉。」那個小朋友，就是最近剛入行的林鈺洧（Denice）。
與女兒Denice林鈺洧當年難得的父女合照，沒想到拍這照片後數個月，兩父女便分開了。
血緣關係
這段婚姻最後只維持了一年多，太太便提出分開，帶着女兒走了。「佢（Denice）嗰陣只係得一歲零三個月。都冇話係咪佢（前妻）提出撫養權嘅，咁唔通我同佢爭咩？我嗰陣時嘅心態都未大得晒，我都唔識選擇……嗯……係一個好好嘅驚驗囉！係好『驚』個『驚』喎！哈哈哈！」
再見女兒，她已是個七歲的小童。「佢哋返咗嚟香港，（前妻）問我見唔見佢，咪見囉，就係咁見咗佢一日，幾個鐘頭。個女知道會見我o架……」他忽然若有所思。「我哋喺餐廳見面，佢未入嚟，已經喺門口裝我，我一睇就知係佢……同佢相處嗰幾個鐘，我都只係同佢傾偈，觀察吓佢，佢對住我都冇話驚嘅，係有啲陌生囉……」說着說着，他抿抿嘴，用力深呼吸了一吓。「當時都有眼濕濕o架，因為個腦有太多嘢湧出嚟，簡直一團糟！哈哈哈！」
五、六年前，林俊賢在朋友幫助下，終於在facebook再次跟Denice聯繫上。「呢件事真係好勁！真係要多謝互聯網！哈哈哈！」最後父女相約了出來見面，那時Denice已經是個亭亭玉立的十五歲少女。「佢嗰陣白雪雪，好靚女，唔似o依家咁曬到黑蚊蚊，成個泰妹咁！」說時他笑得十分冧。
「其實咁樣見番面，的確係需要啲時間處理吓。因為我哋當時其實好陌生，但又有血緣關係，好多矛盾喺裏面，唔急得。」猶幸日子有功，現在兩父女的關係已經變得很friend，總算是他對女兒的一點點補償。
