因為舞台劇《親親麗南》，促成了「Deanie姐」葉德嫻和「阿蘇」蘇玉華首次合作。劇未公演，這兩位好戲之人，單是做個訪問，都已經充滿了戲味。
尤其是七十一歲的Deanie姐，頑皮到不得了，只是打了個招呼，隨之便玩扭計，要求這篇訪問要放在中間跨頁。「如果唔係，我唔做o架！」繼而着我直接致電上司，讓她親自對話，重複一次她的訴求後便掛線。「我似唔似黑社會呀？」頓時引得哄堂大笑。
阿蘇呢？雖然比Deanie姐年輕廿載，表現本來亦比較正經，可是在對方的感染下，她也豁出去了。拍照時，Deanie姐一句：「不如我哋扮《Mr. & Mrs. Smith》（史密夫決戰史密妻）呀！我扮Brad Pitt，你扮Angelina。」阿蘇二話不說，便挨着牆擺出很浮誇的甫士和表情，笑到Deanie姐肚攣。卒之接下來的所有合照，她和她只要稍稍有個眼神接觸，都會忍俊不禁，要花多一點時間來冷靜。
再然後，要乖乖坐好訪問了，不知何解一直鬼鬼馬馬的Deanie姐，忽然腰板挺得直一直，整個人顯得很繃硬，相對於阿蘇的輕鬆自在，Deanie姐這刻彷彿完全不能接受一丁點的騷擾；可惜事與願違，遠處忽爾傳來的一陣咳嗽聲，觸動了她的神經，忍唔住要開口「教訓」：「喂，唔好咳呀！咳得好聲啲呀！唔好咁咳呀！」說罷，咳嗽聲果然馬上被消滅了，Deanie姐隨即和阿蘇，鬼馬地哈哈哈大笑起來，可見剛才裝腔作勢的語氣，的確很有演技，不愧為影后。

拍合照時，Deanie姐忽然提議扮《史密夫決戰史密妻》的海報，阿蘇即挨着牆大擺浮誇甫士，逗得Deanie姐甚開懷。

（舌累）飯應

《親親麗南》是蘇玉華和她的男友潘燦良策展的Project Roundabout劇目，邀請葉德嫻演出，就是他們兩人的意思。「呢齣戲嘅『媽媽』角色，我哋一早已經屬意咗俾Deanie姐，不作他人想。所以如果佢唔演嘅話，我哋就唔會做o架啦！」
然後，上天便為他們製造了緣份。「前年我哋做《謊言》，Deanie姐已經秘密嚟睇過；到重演時，佢仲嚟咗後台鼓勵我哋。後來我哋有次喺Element撞到佢買緊飛，就過去同佢打招呼，仲約佢出嚟飲嘢。佢竟然好爽快咁話：『好呀！』」聽見阿蘇扮自己的說話語氣，在旁的Deanie姐偷偷地笑起來。
阿蘇繼續說：「嗰兩個幾鐘，我哋好啱嘴形！最後我哋就問佢有冇興趣做舞台劇呀？佢竟然又話：『好呀！』」此時Deanie姐已經仰天大笑。「其實淨係潘先生，或者蘇小姐搵我，我已經會yeaho架啦！兩個加埋一齊，我更加要（舌累）飯應啦！哈哈哈！」Deanie姐說。「不過呢，我都有擔心過自己，能唔能夠處理到。我第一次做舞台劇，健康方面得唔得呢？個角色拿唔拿捏到呢？不過有佢哋撐腰呢，我覺得我應該係得嘅！」最後那一句，她說得很振奮，信心滿滿的。

雖然Deanie姐（右二）首次跟同劇的（左起）潘燦良、阿蘇和凌文龍合作，但對幾位拍檔卻十分欣賞。「一句好戲之人，已經夠啦！」

將於十二月公演的《親親麗南》，改編自電影《廣告牌殺人事件》導演Martin McDonagh的舞台劇成名作。「我最初係俾英文劇本Deanie姐睇先。佢好得意，竟然叫我寄俾佢，過番郵費俾我。」