港股收復與隱憂

踏入兔年不足一個月，上周恒生指數連跌三個交易日後，出現「終極黃金交叉」利好技術指標，五十天線升穿二百五十天牛熊分界線，高見二萬一千五百一十二點，暫時睇開局不俗。對上一次出現相關走勢為二○二○年十二月初，當時恒指處於二萬六千五點水平橫行，兩個月後發力走高，一度升穿三萬大關，期間累升一成八。
呢隻癸卯兔今年喺股市可以彈得有幾高？今期繼續請另外三位股評朋友點評大市走勢。佢哋分別係中國通海證券投資策略聯席總監阮子曦（Harry）、安里資產管理董事總經理郭家耀（Matthew），以及凱基亞洲投資策略部主管溫傑（Kenny）。

阮子曦、陸叔、溫傑與郭家耀（左至右）。

內地進一步開放中港兩地通關，包括新增通關口岸，以及不再設限額人數，各老友一致睇好整體後市，預計首季會繼續乘通關復常東風，加上兩會在即，有機會帶動指數上望兩萬四至兩萬五點水平。
至於憧憬能否實現，Harry認為進入第二季就會見真章，隨住經濟數據和公司業績陸續揭盅，屆時港股走勢波動較大，全年波幅介乎七千點左右，支持位則約萬八點。Kenny亦點出，若然數據表現符合市場預期，大市喺第三季或迎來另一升浪，全年走勢呈現「高低高」格局。而Matthew亦對後市樂觀，認為港股估值依然喺全球主要股市中墊底，將有利資金流入市場。
以前話美國打噴嚏，香港會感冒，但睇返過去三年數據，美股喺鼠、牛年一片輝煌，而港股表現卻背道而馳，兩地股市只有上年同時下跌，相關性逐漸減弱。不過股市變幻莫測，都要提防灰犀牛隨時突襲，例如環球加息周期仍未見頂，大型企業掀起裁員潮，一眾經濟師均預測美國年內出現經濟衰退嘅機會超過六成，而且難以達成軟着陸；不過亦有投行睇得冇咁淡，如高盛就估計衰退只有兩成五機率，程度亦較溫和。
市場對美國經濟存在分歧，對港股有咩影響？Kenny分析，其實兩個結果都無運行；倘美國經濟數據向好，美聯儲將繼續加息遏抑通脹；反之，經濟出現衰退，企業盈利增長遇阻力，將拖累投資氣氛。喺兩難局面之下，港股表現或受波及。近日中美關係亦因氣球事件緊張升溫，成為港股另一隱憂，不過Matthew未見資金大量流出，相信對後市影響有限。
一眾投資高手上嚟拜年，當然會帶埋利是。綜觀兩集嘉賓嘅選擇，都傾向通關概念板塊，涵蓋衣食住行，與內循環和內需相關，呢個板塊以舊經濟股為主。新經濟方面，近月內地政府對平台企業大吹暖風，國務院總理李克強更強調支持平台經濟健康持續發展，意味行業監管整改接近尾聲，相信可為新經濟股估值帶來收復條件。另外，內房市場已有回穩迹象，同時不少民企內房仍未重上二百五十天線水平，技術走勢相對落後，值得留意。