逢年過節，不少人都會購買鮑魚，除了在聚餐中與親友大快朵頤外，送禮給人亦相當得體。作為首個推出醬汁版罐頭即食鮑魚的品牌「阿一鮑魚」，在疫市之下銷情仍然暢旺，過去一年生意額升約一成。
人稱「一哥」的富臨飯店創辦人及總廚楊貫一，是享負盛名的國際級大廚，以其招牌菜「阿一鮑魚」最廣為人知。○七年時，一哥授權徒弟劉哲宇以「阿一鮑魚」的品牌，推出一系列即食鮑魚產品，希望這位愛徒能夠將自己一生的心血發揚光大。
被一哥封為「鮑魚公主」的劉哲宇，除了繼續做好鮑魚產品外，近年亦推出平價副線，希望打進年輕人市場，讓品牌能夠更加「入屋」。「如果只係為賺錢嘅話，其實我唔使搞咁多嘢，專注做好罐頭鮑魚已經好好賺，但呢個始終係師傅招牌，所以我一直都好努力，希望做到家家戶戶，甚至係全球華人都可以品嘗到『阿一鮑魚』嘅滋味！」

劉哲宇○五年成為楊貫一的入室弟子，並獲師傅封為「鮑魚公主」。

每年農曆新年前的一段日子，「阿一鮑魚公主」上下全體同事，為了趕工出貨總是忙到「踢晒腳」，連老闆「鮑魚公主」劉哲宇亦不例外。
「大家做到無停手，飯都就嚟食唔切，我都要一齊半夜三更趕工。前幾日一時忙亂，我仲喺倉庫成一米幾高嘅位置跌落嚟，好彩有伙記喺正下面接得住我，三個男人抬我去堆紙箱度坐低，郁都郁唔到，無重傷已經算大命！」在出席這次訪問前，她正好在診所完成物理治療。
在訪問期間，劉哲宇向記者播放一段來自美國代理商的WhatsApp錄音，內容主要是當地的罐頭鮑魚賣斷市，希望她幫忙安排運貨到當地，以安撫客人的鼓譟心情，即使價錢貴些無錢賺也沒所謂。「我哋○七年推出、五百幾蚊一罐嘅頂級金裝『阿一蠔皇鮑魚』一直都係王牌產品，好多客人食開呢隻味就堅持買番呢款，我都想畀到貨佢，但真係做唔切咁多貨，每逢過年前都係咁！」

疫市下銷情暢旺

來自台灣的劉哲宇在○五年時成為一哥的入室弟子，獲師傅親自封為「鮑魚公主」，並一起合力研製即食鮑魚產品，成為首個推出醬汁版罐頭即食鮑魚的品牌。「嗰陣嘅罐頭鮑魚全部都係用湯汁浸住，客人要額外再調醬汁，因為要將保留到醬汁嘅原味係好難做，通常擺一段時間就會變味。我哋當時搵咗台灣食品工廠，用咗成噸鮑魚不斷嘗試，先研製到呢款產品！」
花兩年時間研製成功後，劉哲宇便創立公司「阿一鮑魚公主」，並獲師傅授權以「阿一鮑魚」的品牌推出產品。有一哥做生招牌，產品甫推出便賣斷市，「擺一日銅鑼灣崇光百貨專櫃可以做到成五、六十萬生意，嗰陣仲要未有咁多產品，主要都係罐頭鮑魚，搶手到啲客連凹罐都唔放過。仲記得當時專櫃嘅貨賣晒，我哋要去超市買番自己嘅貨去賣，費時客人嚟到空手而回。」她憶述當時的盛況。

劉哲宇銳意將「世界御廚」楊貫一的「阿一鮑魚」品牌發揚光大。

在疫市之下品牌銷情仍然暢旺，過去一年生意額升約一成。至於這個農曆新年，除了代理商呻不夠貨外，不少企業客亦訂購過百萬大額訂單送給員工做過年禮物。
劉哲宇說：「往年大企業有預算去搞下員工聚餐，o依家無得搞就轉去送福袋畀員工，入面有罐頭鮑魚、海味等，呢段時間我哋都接唔少企業大單。最近有間公司趕住新年前訂購送畀員工，訂得太急，我哋一時間都出唔到咁多貨比佢，由烹調、運輸、包裝樣樣都係工夫，所以都無辦法接到呢張大單。」

副線帶動淡季生意

除了王牌罐頭鮑魚外，品牌近年亦推出不少平價副線系列，例如不同風味的鮑魚撈烏冬，又或是一百元有找的袋裝醬汁鮑魚。「o依家後生仔唔係人人識煮番兩味，所以呢啲即食懶人包就啱晒，隨時喺屋企整番熱就可以當一餐。撈烏冬講緊四十蚊一包有四隻鮑魚仔，真係抵食；買包袋裝鮑魚平時加多個餸，又好食又方便，就算係請朋友上嚟食飯都唔失禮！」

近年「阿一鮑魚」推出平價副線系列，包括是不同風味的鮑魚撈烏冬，四十元一包便有四隻鮑魚仔。

相比起以往主力在旺季銷售的鮑魚產品或海味，平價副線的價錢親民入屋，正好帶動品牌在淡季時的生意。「今年我哋口號係『御廚級阿一即食鮑魚，煮入你屋企』，就係想大家平時喺屋企都可以食好啲，嚟緊我哋唔止限於出鮑魚產品，新年後會陸續推出磯燒金蠔、麻辣鴨血、台式牛肉麵等，都係主攻後生仔市場，融入大家日常生活中。」

「阿一鮑魚」今年推出新產品「御廚級乾鮑口味即食鮑魚」，以乾鮑口味的鮑汁取代蠔皇口味，風味十足。

十多年來為品牌忙裏忙外，劉哲宇坦言早就想退下火線享受人生。「有人問我做咩為咗賺錢咁搏命，其實錢真係一早就賺夠，如果唔係當初應承咗師傅將佢金漆招牌發揚光大，我都想退休唞下。前排同師傅慶祝生日，佢同我講無交錯品牌畀我打理，師傅心願係全世界有華人嘅地方都食得到佢嘅鮑魚，我一直都好努力，已經差唔多做到，係差歐洲、英國市場未去到，叫做對得住師傅嘅信任！」

「阿一鮑魚」目前在二十多個地點設有專櫃，包括銅鑼灣崇光百貨，方便客人購買過年禮盒。

最令這位鮑魚公主高興的是，在美修讀金融的十九歲寶貝兒子，對於接手師公的品牌頗感興趣。「我得一粒仔，咁多年專注生意，過時過節無辦法飛過去陪佢，成日都心掛掛，難得佢有興趣經營呢門生意，起碼我努力多幾年就可以交畀佢接棒。我講就講想退休唔做，但始終係經營咗十幾年嘅品牌，所有嘢都親力親為，每一件產品都好似親生仔咁，所以我都唔捨得嘅！」

寶貝仔二百蚊入手比特幣

除了經營生意有一手外，劉哲宇在投資方面亦有自己一套，「我比較穩陣，有買下債券，呢邊每年有十幾萬美金收入，啱啱好夠供個仔讀完中學。住宅、商舖、車位都有投資下，有出租有自用，可能因為我自己鍾意有安全感啲，所以我唔會借貸，又唔會租地方用，有需要就買，起碼唔使擔心加租要搵地方先。」

過去一年受疫情影響，不時出現商舖劈價個案，她表示自己正物色適合的商舖入手。「我考慮緊買唔買上水舖位好，有危自有機，等疫情過咗自由行番嚟，嗰邊市道自然會復甦。」
她的兒子在投資方面亦表現奇佳，中學時期已對金融市場頗為關注，中三時便以二百元入手比特幣。「佢又有研究下美股，叫我去買，呢邊我都賺唔少。之前佢畀我睇佢戶口時，睇到金額我都嚇一跳，無諗過佢人仔細細已經賺咁多！」

劉哲宇與十九歲的兒子雖然經常分隔兩地生活，但關係相當融洽。