疫情持續，新興的娛樂，是看網上直播如付費演唱會；免費的還有IG live、fb live，攝位風花雪月，自娛放負。
音樂人伍仲衡（Harry）的fb live，由四月開始，至今每周兩次，累積已有近三百萬人收看。直播中的他時刻接點唱Order，十指以琴鍵奏出旋律，快過歌者找歌詞，更被譽為「神之手」。「彈咗琴三十幾年，我太鍾意八、九十年代嘅流行曲，由校長、哥哥、梅姐、學友開始，我冇刻意去記啲歌點彈，係muscle memory，入晒血。
「我學琴唔鍾意睇譜，考琴都係啱啱合格，但就好鍾意自由、即興，聽流行曲『執歌』。以前冇YouTube，我係聽住cassette帶，每首歌逐個bar逐個bar去聽，再喺個琴度執番成首歌出嚟。音樂唔係用雙眼學，有唔少人冇樂譜就唔識彈，用耳仔學音樂，反而會獲益更多。」
眼見未為真，所以伍仲衡放棄攻讀前途無限的土木工程，於九十年代便全情投入做Band仔。「俾屋企人鬧咗三年，但我決定做呢樣嘢，就冇得返轉頭，咁就做咗廿四年。」
人生，思考不來，也是一場Live。沒有樂譜、沒有劇本，隨時要執生，與其步步為營，何不如四十五歲的伍仲衡般，自由奔放、隨遇即興？

 

 

跟女神做Friend

伍仲衡做fb live的初心，除當正能量充電器，其實也源於音樂。「我一直都有同側田、Mr.嘅布志綸同埋一啲樂手，喺一啲live house度jam開歌，但因為疫情，我哋冇晒呢啲活動，布志綸話好悶，我就叫佢上嚟我studio玩，於是就做咗第一個fb live。」
訪問在伍仲衡的私人工作室進行，他坐在平日做直播的錄音室，彈着沒插電的電子琴，一樣勁度十足。「之後我call一啲好朋友上嚟做，王馨平、王菀之，啲人睇live睇得開心，我有得jam歌都開心。Vivian（周慧敏）睇到，就話o依家好多人喺屋企好悶，叫我keep住做，佢見我之前冇乜玩social media，仲教埋我開fb page添。
「其實識到Vivian，仲同佢做埋好朋友，都算係我入行咁多年最難忘嘅事。我讀中學嘅年代，佢係『玉女掌門人』，即係o依家嘅女神，我中六嘅時候，佢係聯校歌唱比賽嘅表演嘉賓，當時佢要唱〈天荒愛未老〉，就問台下有冇同學識彈，我俾人推咗出去彈，可惜冇影到合照！到〇八年識咗佢之後，我都有同Vivian講番，真係發夢都冇諗過！」
入行廿四年的他，近年雖已減產，但仍有為周慧敏製作新歌，多年下來，他創作及製作的歌曲近二百五十首，當中最花時間製作的，是衛蘭的歌曲。「首歌唱咗成四十個鐘，經歷咗三間studio，衛蘭自己都講過，當我同佢都覺得唱得好嘅時候，黎生（衛蘭當時所屬唱片公司老闆黎明）唔收貨，仲提議一啲新嘅唱法，佢要求好高，而出嚟嘅效果梗係好過原先嘅版本啦！」

原本家人反對他棄讀土木工程，投身音樂做Band仔，但九八年他從顧嘉煇手中，接過「Cash流行曲創作大賽」冠軍獎座後，父母也開始支持他的決定。

元祖女神周慧敏是他固定開fb live的支持者，還指導他開個人fb專頁，「我之前唔玩social media，係Vivian叫我要keep住做live。」近年減產的他，最近也為好友寫歌。