盧覓雪（Michelle）好喜歡笑，而且每每都笑得很開懷，令身旁的人感覺愉快。大概就是因為這股感染力，所以觀眾普遍都認為她充滿喜感。「其實大家只係冇機會接觸到我認真嘅一面啫，我認真起上嚟？哼，連我自己都驚呀！」說罷，她冷笑了一下。
在走到幕前之前，她曾經在平面傳媒打了逾廿載工，記者、編輯、管理層的職位都做過。「我係八十年代頭入行，第一份工做《香港周刊》，跟住我轉過九萬幾份工，雜誌、報紙都有。」
而「盧覓雪」這個筆名，就是由她任職《香港周刊》時，開始沿用了。「我係張愛玲嘅書迷，佢呢個名都係由英文名Irene譯出嚟，我咪譯番我個英文名做『覓雪』囉。」
然後，她把這個名字從九萬幾份報紙雜誌，帶到大氣電波，繼而帶入屋的公仔箱，再跳上大銀幕，一個轉彎再走進社交媒體。時而是個節目主持，時而是個專欄作家，時而又是個電影電視劇演員，「間中都有拍吓廣告嘅。」身份百變，是實實在在後生一輩口中的Slash；但她自己，卻沒想得那麼複雜：「我會簡單啲咁講：我係一個傳媒人。因為我做嘅所有工作，都係同傳媒有關。傳媒人，呢個身份最準確。」
踏破天涯無覓雪，Michelle今天仍能繼續走勻整個傳媒界，當然未致於得來全不費功夫。

 

講講講

要說真正被外界認識，Michelle說，應該是○四年加入商台主持《在晴朗的一天出發》開始。「呢個可以話係一個big move。」畢竟由文字轉為聲音表達。「做電台live節目，冇得寫定，因為有拍檔，你講一句，人哋就可以帶咗去第二度，所以要go with the flow，錯都要繼續行，冇得返轉頭，因為所有人都聽住。」
○八年離開商台後，是她最迷惘的時期。「嗰陣我正式開始係一個自由人，冇打工，唔知自己想做乜，但又好好彩，不斷都有好多唔同嘅工作機會搵我。」其中一份是為電訊商每天拍片，論盡當日的娛樂新聞報道。「段片佢哋晏晝就要上架，所以我朝早八、九點就要錄影，啲內容我要自己寫好晒稿，跟住就對住鏡頭講、講、講。」錄影節目，照計比起做電台live更易處理吧！「對我嚟講，live節目易做好多！錄影呢，係可以無限NGo架，但人好得意，一知道可以無限NG，就會NG。
「咁我就同自己講，要當live咁去做，唔俾自己錯，要一take過！唔好嘥時間！所以對我嚟講，呢份工俾到我嘅組織能力，一個好好嘅訓練。」

在ViuTV處境劇《娛樂風雲》中，角色跟劉錫賢有感情線。「我哋仲有場牀戲，拍嗰日，賢哥仲帶埋佢女朋友嚟，笑死我！」

自從與阮兆祥化身Twins合唱《風箏與風》後，多年來，他們兩個便成為了開心孖寶。