路難行、難行路。
用這六個字來形容李泳豪的娛樂圈演藝路，其實不會錯。
童星時的李泳豪，拍檔的粒粒都是巨星，梁家輝、林青霞都曾經演過他的父母。
成年後加入娛樂圈，卻是路路不順，拍第一套電影剛上畫，就遇上老闆與院線鬧分歧，電影被即時落畫，繼而就到老翻VCD興起。
「呢啲係咪冇運，都係啦！之後就同自己講，可能做人受多啲挫敗，會係好事啦！」
入電視台拍劇，初期拍的劇集，大部份都賣埠，香港人很多都未睇過，之後可說是越做越沉，就連他自己都形容：「唔夠騷，茄喱啡都要照做啦！」
星二代來說，可說是最「路途艱難」的一個。

 

即將四十歲，入行廿年有多，經歷是低多於高。
有心酸？有不服氣嗎？
「有，但後來就覺得因為咁而唔開心，其實係搵自己笨。」
灰心、失望難免，哪知道近年在《愛‧回家》中，演戲份不算重但感覺十分地道的茶餐廳夥計，反而被人受落。
又乘着父親李家鼎的「飲食運」，開始投資開舖經營飲食生意，境遇開始有轉變。
「做人就係咁，條路點樣都好，都要一直行落去，就算有老虎獅子喺面前都係咁話，不可以跌低，一直行，就一定可以有收成。」
就連人也容光煥發起來，看似是掃去了多年來的「晦氣」感。
要相信，人生不會永遠在低潮，總有一天，終可直掛雲帆濟蒼海。

欲上銀河塞川

問李泳豪到底入行多少年，就連他都要呆一呆，想一想，才說：「如果由做童星開始計，即係一九八五年到o依家，三十幾年吧！若果計由外國返香港開始拍戲拍劇，九九年到o依家，都有二十一年。」
坦言做了這麼多年，其實早就做到有點厭。
「失望呀，因為我曾經好執着，好想去做某些事。初初返香港時，就好似所有新人一樣，好想紅、好想爆出來，但這行很講運、很講際遇。其實最初幾年，我拍了很多劇，但拍完都賣了埠，香港冇播過，觀眾根本不知道。」
有早知的話，會決定不入行嗎？
「可能也不會，當年媽咪（施明）拍《醉拳王無忌》時我去探班，就已經覺得好好玩，做童星時又拍得好開心，好自然就會想做呢行，就算真係有得再揀，可能我都係會做娛樂圈。」
但原來世界變得太快，做人也不一定事事如願。
「冇人會知做童星好，到長大入行就唔好嘅，這麼多年來，有人睇唔起我，真係乜難聽說話都聽過，就當係訓練自己EQ，o依家睇返轉頭，一笑置之啦！」
不過，李泳豪還是有最hurt的一次。

在《愛‧回家》中飾演茶餐廳夥計，想不到好評如潮。「係如實反映某些茶餐廳夥計『hea』爆嘅態度，但竟然有好多小朋友鍾意，成日喺舖頭見到會問我，『乜你唔係賣咖啡嘅咩？』」確實係世事難料。

「最hurt一次係，試過唔夠騷，咁就乜都要做啦！有一場戲，某個外國返嚟嘅女演員要跳樓，我就做救佢嘅人，但就要心口畀佢踢一腳，點知佢踢來踢去都踢唔準，我教咗佢幾句，佢就話番我轉頭：『我都唔知你係邊個，做乜要聽你講！』我當時唯有同自己講，佢外國返嚟，可能真係唔識我啦！」
最低潮時，常常都是做一些冇對白的路人甲、乙、丙。有想過放棄嗎？
「冇就假嘅，近幾年其實都拍少了，主要都是拍《愛‧回家》，反而仲多咗人識，有啲小朋友見到我，會問我係咪賣咖啡嘅豪仔（劇中角色）？以前好出力咁去拍戲冇人覺得好，反而地地道道咁演一個態度麻麻哋嘅茶餐廳夥計，竟然仲多人睇，真係你又點估到？」
其實李泳豪條件不錯，但就是運氣不濟。
「老竇成日話，從來冇人話你做咗就一定得，世界唔係咁，盡力做好晒，結果如何，無人可知。有時越畀心機落去嘅事，結果可能反而背道而馳，就只能說是個天自有安排。」

孖生哥哥李泳漢結婚，一家五口齊齊整整合照，幾年之後，李泳漢已經生了兩個。「呢個又係估佢唔到，最初阿哥同阿嫂拍拖時，我都唔睇好o架，點知佢又真係成家立室開枝散葉。」