何婉盈（Elaine）九一年參選港姐入行，九六年淡出娛樂圈，兩年前，因為獲邀請上《流行經典50年》獻唱，才回歸幕前。「嗰陣我個女得十歲，我冇同佢提過我之前做乜，所以就帶埋佢去錄影廠，俾佢知道，媽咪以前唱過歌。」
九月中，她將會參與《記得……我們的主打歌》音樂會，與另外八位《新秀》出身的男女歌手，重溫八、九十年代的經典金曲。「我當年都曾經拍過鄭秀文做《新秀》司儀，都叫做有啲《新秀》嘅血統o架，哈哈哈！」

 

 

她從前是父親的掌上明珠，嬌生慣養；今天，她已是個身兼父職、從事金融股票的女強人。回歸平淡這廿多年來，她結過婚、離過婚；在體會喪父之痛的同時，嘗過憂柴憂米；甚至更任性地未婚生女。
經歷或許不算蕩氣迴腸，但總夠令人唏噓感慨吧！可是呢，這天Elaine說起來，卻沒有一點傷春悲秋，四十八歲的臉上，也看不到有半點歲月催人的滄桑痕跡，大概因為她有個疼錫的女兒，又有一份她相當喜歡又自由的工作，已讓她感覺滿足了。
「呢家我好多嘢都settle down咗，接觸番幕前，我只係以輕鬆嘅心態去面對，有job咪做囉。」
事實上，Elaine還有很多話想說，還有很多歌想唱。

明星夢

何婉盈（Elaine）坦言，九一年她參選港姐，全因自己發明星夢。「我細個已經好鍾意對住鏡頭唱歌拍戲，好想入行睇吓自己得唔得，不枉此生嘛！咁當年入行都係得三個途徑啫：訓練班、新秀同港姐。我喺美國讀完year one返嚟放暑假時，啱啱港姐就接受報名，咁就嚟啦！」
這樣的決定，換來了父親的囉嗦。「佢係覺得有啲遺憾嘅，咁辛苦供我讀書，讀完第一年就話唔讀。但係我當年諗，讀埋U都廿二歲，好老！咁我咪一意孤行囉。」
結果她雖然只入了五強，但由於樣貌長得親民，兩星期後便獲無綫安排主持《勁歌金曲》。「嗰陣我係拍倪震一齊做。上得嚟《勁歌》嘅，都係張學友、郭富城、黎明、劉德華、葉倩文、阿Lam（林子祥）……嘩！我十六、七歲已經聽佢哋唱歌，o依家可以見到真人喎！好開心o架！」
主持方面，她幾乎所有音樂和綜合節目也參與過，「連體育節目我都主持過o架！」尤以九四年到美國採訪世界盃，印象最深刻。「去咗一個月，由第一場睇到最尾嗰場。因為個記者證只可以睇到尾二嗰場，總決賽嘅時候，我就用咗幫雜誌寫稿嘅五千蚊稿費，買飛入場睇，張飛仲keep到o依家。」

九二年，Elaine加入樂壇，與曾航生合唱一曲《再見亦是朋友》走紅。「我嗰陣比較雞仔聲，所以好快就被淘汰咗啦！哈哈哈！」

九一年，在美國讀完大學year 1後，Elaine便趁暑假回港，參選港姐。「我嗰陣真係好想入行，咁啱接受報名，咪選囉。」