新生代ESG推手

講到可持續發展，環保、綠色、低碳、氣候變化、碳中和等都係我哋經常聽到嘅關鍵詞，亦係大家認同嘅重中之重。不過認同唔代表入腦，入腦又唔代表付諸行動。當然政府同環保團體可以經常提醒市民，但專家之言市民聽得多慢慢會左耳入右耳出，因此ESG（環境、社會及管治）要推得成功，一樣要度出好橋。

外國有環保網紅製作得意短片喺TikTok播，吸引數以十萬計粉絲。其中一個KOL經常去沙灘執垃圾，擺成唔同造型拍片，又將聖誕歌改編成「垃圾聖誕12天」（Twelve Days of Trashmas），吸引小朋友追蹤跟住唱。香港都有一個環保網紅「大嘥鬼」，仲出埋隻rap歌，成功入屋。好多小朋友見到大人去餐廳叫得太多餸，都識得講「食得晒先好嗌」，「咪做大嘥鬼」。

事實上，可持續發展關乎下一代嘅生活甚至生存，所以由後生仔度橋去推應更啱聽，效果更佳。有見及此，香港廣告客戶協會（HK2A）最近舉辦咗一個ESG企劃推廣大獎，邀請十八歲以上學生同三十五歲以下青年參加。籌委會入面都係marketing高手，其中亦有ESG專家，佢哋創辦呢個獎，主要係見到市場上形形色色嘅推廣，一般都係針對產品服務甚至係企業，但推ESG都係近年至開始。

同時，雖然年輕人創意澎拜，但可能本身對ESG營銷認識唔夠深，學校亦只有少量學程，另外佢哋對於企業內部運作唔熟識，因此諗到嘅橋未必能落地。HK2A於是決定將新生代同企業拉埋一齊，再搵不同ESG專家，希望令參賽者度出創新而企業用得着嘅方案。

ESG企劃推廣大獎籌委希望發掘新生代創意。

過去一個月，大會舉行咗幾場名師講座，由學術、企業、社企、推廣等不同角度，為新生代全面解釋ESG可以點實行。好似有社企介紹，拾荒本身有環保作用，但執紙皮嘅老人家辛勞一日至揾到幾十蚊，於是社企一方面同不同企業聯絡，上門收集可回收物料，又得速遞公司幫忙將物料送去中心，再為長者upskill，學習點樣將物料拆成不同回收資源，等佢哋可以喺中心室內工作，所得工資較多亦工作得更有尊嚴。呢種透過合作而達成ESG目標，又能持續經營嘅模式，相信可以令學生得到啟發。

新生代獲取資訊都來自數碼媒體，溝通都係一句起兩句止加emoji，未必鍾意寫文字建議書，因此HK2A呢個獎項接受圖畫或視頻作品參賽，籌委話參賽者畫公仔表達亦得。大會更安排AdTech公司講解數碼營銷嘅最新狀況，幫參賽者考慮點樣運用數碼渠道同KOL作推廣。

我覺得年輕人參賽或透過講座了解ESG，對於日後嘅事業選擇都好有幫助。有招聘機構估計，香港現時有幾千個可持續發展職位需要填補，而港交所正進行諮詢，建議將ESG提升為強制披露及增加氣候訊息，明年生效，屆時相信好多上市公司會加入搶人才戰陣，新生代可認真考慮入行。