後事非身後之事

十幾年前有一齣美劇《Six Feet Under》，故事圍繞一個家族經營嘅殯儀館，每集開場都有一人離世，從死亡帶出對人生嘅反省。劇中經常出現主角與「先人」對話嘅情景，「先人」對於家人選擇嘅殯葬禮儀都常有意見。有人話有得揀，你至係老闆，但就算你係老闆，對於後事多數都無得揀。所以我會諗，一個人過世，如果被安排喺完全陌生嘅地方進行葬禮和安葬，感覺唔太理想。假如生前可以自己揀定，係咪更合自己心意？仲唔使拖累子女，或者令後人在決定殯葬事情時出現爭拗。

其實唔只我係咁諗，我有機會認識咗福壽園（1448）主席白曉江，再親身去考察過，至知道內地殯葬業已經發展得好先進，概念更加比香港前衛。福壽園係國內最大殯葬服務提供商。公司嘅產業鏈包括公墓、殯儀、殯葬設備、生前契約、規劃設計、生命教育等。其中「生前契約」就係在生前訂立合約，選定殯葬儀服務，概念源自英國嘅遺囑信託，在歐美生前契約已有60多年歷史，在內地仲係發展階段。福壽園積極開拓生前契約業務，二○一七年全年簽訂1174份契約，邁出殯儀預售服務第一步，將來有望成為重要嘅業務板塊。生前契約除咗遺體接送、靈堂搭建、告別儀式之外，仲包括法律諮詢服務，減輕後人嘅負擔。

香港火葬場一直不敷應用，但係要起新爐，地區又有阻力，原因之一係擔心污染問題。福壽園嘅環保火化機已取得國家發明專利，將會向上海一間國營殯儀館提供六台環保火化機，在環保意識日益提高之下，相信環保火化設施可成為公司發展嘅重要引擎。

公司自二○一三年上市以來，營業額及盈利已翻了再翻，剛公布二○一七年業績，錄得收入14.77億元人民幣，按年增長16.5%。股東應佔溢利4.17億元人民幣，按年增長23.1%，主要受惠於增值及多元服務。由於公司資源充足，未來可繼續透過併購以壯大業務基礎，維持穩中求進嘅特色，呢點亦係我長期推介嘅原因之一。

目前公司墓園及殯儀設施遍布中國十一個省、自治區或直轄市等20多個城市，截至二○一七年年底，公司擁有15座已建成嘅墓園，正在運營嘅殯儀設施15間。另外，公司收購北京一間陵園建築設計公司51%股權，呢間公司嘅公墓及園林設計可以同現有業務產生協同效應。

我都參觀過公司上海、瀋陽和重慶嘅業務，印象最深刻係去體驗一個告別式，中間加插先人嘅故事和家人對佢嘅懷念，令葬禮唔會冷冰冰，我體驗時都深受感動，原來告別可以充滿溫情。規劃和管理身後事，實在係生前之事，亦係好正面嘅態度，通過籌劃後續之事，我哋更能體會活在當下，惜緣惜褔嘅重要性。