主頁 > 專欄 > Paco巨星飯堂 > 好事成雙 2018 年 02 月 18 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

好事成雙

呢個星期正值係情人節同農曆新年拍住上，連「Paco巨星飯堂」嘅嘉賓陣容，都係成雙成對：陳伶俐同老公劉頌銘（Ben Sir）、蘇志威同太座劉小慧，既啱timing又夠sweet！

Ben Sir夫婦最近喺銅鑼灣開設餐廳「宮保」，主打正宗新加坡菜，而伶俐同小慧又係相識多年嘅閨密，今次適逢其會，我就同兩pair模範夫婦，一齊品嘗特色新加坡菜，再細說夫妻相處之道。

Ben Sir（劉頌銘）同太座伶俐拍住上，喺新開嘅主場「宮保」，同相識多年嘅小慧、蘇老闆相聚，喜上加喜。

重金挖角

首先梗係要恭喜伶俐同Ben Sir嘅新餐廳開業！香港嘅正宗新加坡菜館唔多，Ben Sir仲有心地，重金邀得新加坡名菜田雞粥嘅師傅，嚟香港發揚飲食文化。伶俐表示：「我老公係新加坡華僑，之前又喺當地服過三年兵役，嗰時佢成日幫襯田雞粥舖，但係咁多年都冇喺香港食到，我哋好鍾意食o架，所以咪喺呢度開一間。」

Ben Sir就話：「我想做到同新加坡一樣咁好嘅水準，所以就請埋當地嘅田雞粥名店主理人龍師傅過檔，佢做嘅宮保汁，係我食過嘅最好食，香辣兼備。餐廳叫『宮保』，都係因為呢個醬汁。」

伶俐補充：「o依家餐廳除咗田雞配粥，仲有雜菌、鰻魚⋯⋯其他夾宮保汁嘅菜式，主要係因為我之前唔食田雞o架，但係因為準備開餐廳，我要成日試菜，食咗之後又覺得OK喎，好滑好香。

「好多時我都會喺餐廳幫手，仲會同啲客推介菜式，其中一個蜜餞桂花鱔，我同啲客講唔好食唔收錢，都冇人要我請佢哋食！」

我喺Ben Sir嘅主場同兩pair模範夫婦暢聚，品嘗最正宗嘅新加坡佳餚，細說開設餐廳背後嘅故事外，四位嘉賓仲分享佢哋嘅甜蜜食經。

一月尾餐廳正式開業，除咗「鎮店之寶」大沙煲，伶俐夫婦仲邀請食神韜韜擔任剪綵嘉賓。

宮保田雞（大$268/細$148）以每隻重約四両嘅鮮活牛蛙炮製，加上秘製宮保醬汁，香辣惹味。

餐廳喺新加坡特別訂製砂煲，用作盛菜器皿，而師傅親手攪足四十五分鐘嘅白粥，都係以砂煲侍客，另有油麵、米線供客人選擇。

宮保豆腐配雜菌（大$288/細$198）係宮保醬汁另一搭配，嫩滑嘅豆腐加上花膠、雜菌，味道一樣match！

高手坐陣

伶俐屬於親力親為嘅老闆娘，而且佢喺圈中人緣極佳，唔少好友都紛紛捧場。蘇老闆仲係田雞粥嘅粉絲：「我只係喺新加坡食到有水準嘅田雞粥，o依家就唔使去到咁遠都食到！個汁真係好得！加埋啲粥好綿好香，好好食！」

小慧同伶俐份屬閨密，自然力撐。「我哋識於微時，o依家雖然唔係成日見，但係一切在心中！」

新正頭日子，蘇老闆表示：「好多人都知，我每年初三都喺屋企大宴親朋，六十幾人嘅菜式，就交俾我屋企嘅大廚、二廚發辦，佢（一指小慧）係二廚咋，大廚係我外母，佢真係好犀利！」

小慧就話：「新年我最深刻就係幫我阿媽整蘿蔔糕，係咁刨蘿蔔，刨到見晒紅！但係近幾年就好少刨蘿蔔，我反而會切，咁仲食到蘿蔔嘅鮮甜。我哋屋企個煮食爐，係專業用嗰隻，我鍾意喺屋企炒吓XO醬，曾經仲諗住大量生產上架，但係一用到機器整，啲XO醬嘅味道就唔同晒，於是我就擱置咗上架賣嘅計劃。所以我好同意伶俐話，品質同食材係好重要o架！」

蘇老闆盛讚小慧同外母係廚藝高手，而蘇太近年仲學埋中醫，內涵更加全面。

家庭成員由二變三再變四，蘇老闆夫婦嘅感情多年如一，實屬難得。

蜜餞桂花鱔（$138），係老闆娘伶俐嘅推介，脆卜卜帶蜜香嘅外皮，內裏係juicy嘅鱔肉，值得捧場。

鬼馬韭菜花炒牛肉（118），以油炸鬼配韭菜花、牛肉，相當具特色。

秘製辣汁翡翠螺（$138），爽口嘅翡翠螺，配上獨特嘅秘製辣汁，令人一試難忘。

日日節日

過年前就係情人節，劉生劉太、蘇生蘇太都未有特別活動慶祝，伶俐話：「我哋都老夫老妻啦！唔會特別慶祝呢啲節日，遇到啱嘅人又過得開心，就日日都係情人節啦！」
小慧則表示：「我哋兩個連結婚周年都冇慶祝！」蘇老闆接住話：「之前我哋結婚廿周年，都係我到正日嗰晚，係咁意提吓佢。嗰日我要做show，做完show先醒起咋！講到情人節，最好嘅大餐就梗係我老婆煮嘅菜啦！」

哈哈哈！即使係老夫老妻，都可以好似蘇老闆咁有生活情趣。而正如伶俐所講，開心地同Mr.或Ms. Right過日子，每一日都係情人節。無論你身邊嘅Mr.或Ms. Right出現咗未，最重要都係活得開心！乾！