匡樂無限
一首好歌，足以傳頌多年。一首〈高山低谷〉，令默默耕耘已久嘅林奕匡（Phil），終於有所收成，仲獲得更多機會去發揚廣東歌文化添！嚟緊佢將會喺九展舉行音樂會，繼續以音樂感動樂迷。
今次「Paco巨星飯堂」，我就帶Phil去到位於蘭桂坊嘅「FUMI」，品嘗特色嘅日本料理，暢談音樂經外，仲會公開佢同太太之間嘅傳情食譜。
喺年輕一輩嘅音樂人之中，Phil可謂其中出色嘅一位，既有靚聲又有深厚音樂底子，值得關注。
預埋老友
講起三十二歲嘅Phil，佢嘅金曲〈高山低谷〉仍然係唔少樂迷嘅心水，但成名之前，佢嘅付出都不可抹殺。「一〇年入行嘅時候，本來只係諗住試吓，俾兩年時間自己，但到真係實行先發現，喺呢行工作，並唔似當時話兩年就兩年咁死，而係一個再長線啲嘅事業。成個過程係既辛苦又開心嘅，辛苦係因為我離開加拿大嘅屋企，嚟到香港乜都冇，但當中嘅開心係多好多嘅，我識到好多好朋友，仲可以一齊玩音樂，係最開心嘅事。」
而佢嚟緊會同一眾friend底音樂人，於九展舉行音樂會《林奕匡 & Friends繽紛音樂夜》，同friend和樂迷開party，樂趣自然倍增。「今次我搵咗糖妹、ToNick、Lil‘ Ashes同葉巧琳，一齊同我jam。唱歌之外，我會玩番自己拿手嘅saxophone，其他細節暫時唔可以透露住，因為我想到時俾驚喜大家。」
我帶Phil去到位於蘭桂坊嘅「FUMI」，品嘗特色嘅日本料理，暢談佢開show嘅心情外，仲會公開佢同太太之間嘅傳情食譜。
嚟緊喺6月3日，佢會同一眾friend底音樂人，於九展舉行《林奕匡 & Friends繽紛音樂夜》，令人期待。
湯葉海膽配芥末醬汁（$168），選用北海道海膽，加上自家製芥末醬汁，及來自京都嘅腐皮，令海膽嘅鮮甜味更突出，更甘香。
山形縣黑澤農園白雪女皇米伴靜岡縣櫻花蝦（$288），女王米為新興米種，主要產於山形縣，由越光米改良而成，比越光還要煙韌，配上櫻花蝦，特別鮮甜。
小城大志
嚟自加拿大嘅Phil，係其中一位我欣賞嘅年輕一代音樂人，有呢啲年輕人，香港獨有嘅廣東歌文化，先可以繼續傳承落去。「好多人以為，我喺加拿大嘅一個小島長大，就完全唔識香港文化，但其實我由細到大，都係睇香港嘅節目、聽廣東歌，好嚮往香港嘅所有嘢。到後來參加新秀，決定以唱歌作為事業，都同我細個嘅成長環境有好大關係。
「o依家我除咗寫歌俾自己，都有寫俾唔少同輩嘅歌手，嚟緊我最大嘅夢想，係為我嘅偶像寫歌，好似Joey、學友，當然我希望可以同多啲唔同類型嘅歌手合作啦！」
哈哈哈！有志者事竟成，以Phil嘅才華，我相信佢嘅夢想一定有成真嘅一日。「啱啱我同太太去咗上海，睇一級方程式賽車，有一日我哋去食飯，食食吓聽到餐廳播咗學友嘅歌，仲係廣東歌嚟添，我覺得學友嘅威力，真係好犀利！」
身為唱作人，Phil除咗為自己同朋友創作，佢仲希望為自己嘅偶像容祖兒同學友，度身訂造音樂作品。
雖然近年不斷獲得認同，但我欣賞Phil仍保持對音樂嘅熱誠，實在不可多得。
Phil之前嘅專輯叫《My Taste of Life》，除咗音樂，佢對人生、對飲食，都有唔同嘅品味。
餐廳另有兩款分別六道菜及八道菜嘅Tasting Menu，供食客選擇。後者（$1,180）嘅主菜為網燒宮崎牛西冷配海膽，嫩滑嘅九州牛配上鮮味嘅北海道海膽，為味覺提供雙重享受。
伊勢龍蝦海膽湯葉卷（$598），揀選來自京都嘅湯葉腐皮，以伊勢龍蝦肉及北海道海膽為材料，將其炸香，增添香脆的口感，龍蝦肉質爽滑juicy。
照燒宮崎A4和牛西冷配以壽喜燒汁伴溫泉蛋（$498），大廚首先以自家製壽喜燒汁，將宮崎A4和牛西冷慢煮兩個小時，於客人下單後再將其煎香，將通常切成薄片嘅壽喜燒牛肉轉為厚切，令菜式更見美味而獨特。
窩心料理
除咗創作音樂，Phil仲會為太太Rikko炮製愛心甜品。「佢好鍾意食甜品，就係因為咁，所以我有去學，學完就整俾佢食。佢特別鍾意食雪糕蛋糕，有一次我就專登整一個mint（薄荷）嘅俾佢，點知佢話最唔鍾意就係mint flavor，我就話下一次就整個佢最鍾意嘅cookies and cream俾佢囉。」
Phil冇做好功課就發功，相對嚟講林太就專業好多。「一二、一三年，係我最失意嘅時候，好掛住加拿大嘅屋企人，但又做唔到啲咩成績，唔敢亦都冇錢返去。嗰時佢返去探屋企人，就去咗搵我爸爸，問佢點樣整麻婆豆腐。
「以前我爸爸喺加拿大開餐館，佢煮嘢食好叻，其中麻婆豆腐係我最鍾意食嘅菜式，喺香港咁耐，我都食唔到一個可以同爸爸煮嘅相比嘅麻婆豆腐。當時我太太知我homesick，所以就俾咗呢個surprise我，同我爸爸學完就返嚟香港煮俾我食，真係好感動。」
Phil仲表示：「o依家煮嘢食同洗碗一樣，係我減壓嘅最佳方法，兩樣嘢同音樂完全無關，有時仲會inspire到我添！」
Phil稱林爸爸嘅麻婆豆腐，係世上最無法取代嘅味道。
啱啱同太太Rikko去上海睇一級方程式賽車，期間二人喺當地餐廳用膳，聽到餐廳播張學友嘅廣東歌，令佢特別有感覺。
六道菜Tasting Menu（$880）就包括刺身拼盤（右圖）及甜品櫻花、花見丸子（左圖）。刺身有吞拿魚腩、 櫻花鱒魚、 鯛魚、 縞鰺；後者嘅櫻花葉下，為內餡藏紅豆蓉嘅粉嫩果子，加上三粒小丸子，精緻味美。
FUMI
地址：中環德己立街30-32號加州大廈6樓
電話：23283302
